Ray Online｜何俊賢指未聽過Uniqlo有何運動出品 面對質疑鬧網民戇居
巴黎奧運熱潮持續，民建聯立法會議員何俊賢都緊貼賽事，佢欣賞緊乒乓波賽事嗰陣，留意到瑞典運動員著住UNIQLO標誌嘅波衫，話「瑞典嘅贊助商竟然係uniqlo，無乜聽聞佢有乜運動出品」。
何俊賢鬧網民「戇居」
何俊賢喺社交網站發文，質疑好似冇乜聽過UNIQLO有運動出品，仲話「塊板又會唔會係IKEA壓板？」唔少香港網民都好熟悉UNIQLO一向有好多運動服裝，留言鬧何俊賢無知，何俊賢就反駁話「我不可能全知全能。孔子曰知之為知之，不知為不知，是知也」。唔止一個網民話佢無知，仲有人話「無知唔係罪，唔識搜尋衝出嚟x，就真係....」何俊賢竟然鬧個網民「戇居」，「戇居，而家是要發表論文嗎？ 以為別人一定要全知才是有病。我在體育某領域只是一個普通市民，不是工作何必要太過審慎而失去樂趣。」
另外，仲有網民提醒「UNIQLO已經贊助(網球手)費特拿波衫好幾年了」，何俊賢回應「我無乜留意咁細，但佢本身形象唔似運動品牌」。不過睇嚟何俊賢都唔想再糾纏落去，結果刪文了事。《am730》記者曾經致電畀何俊賢查詢，不過冇人接聽。
