Ray Online｜修例禁止餵飼野鴿 李梓敬口誤稱「成功捉到啲乳鴿」(立法會直播截圖)
街上成日都有野鴿，立法會大會今日審議野生動物修訂條例草案，將禁止餵飼野生動物嘅規定擴展到涵蓋野鴿。新民黨立法會議員李梓敬提到以前問漁護署借咗捕鴿籠，成功捉到野鴿，不過就講錯做「成功捉到啲乳鴿」。
李梓敬發言嗰陣話，當年喺又一村做區議員，野鴿問題已經係區內其中一個備受關注嘅問題，尤其喺又一城位置，餵飼野鴿嘅問題好嚴重。佢回想當年曾經擔任當區屋苑法團委員，問漁護署借捕鴿籠，先知原來屋苑要負責放個籠上天台，再攞返落嚟。不過李梓敬講錯咗佢哋「成功捕捉到一啲乳鴿」，即刻一邊笑一邊耍手更正「I mean野鴿」，但後面嘅黨友陳家珮都忍唔住係咁笑。
歸根究底是餵飼野鴿問題
李梓敬平復完之後繼續發言話，捉咗野鴿之後原來署方唔會處理，只會拎去遠啲放生。居民就覺得好驚訝，因為野鴿識飛返嚟，處理唔到件事，歸根究底都係餵飼野鴿問題。
唔知口誤係咪會傳染，緊接發言嘅謝偉俊犯下同樣嘅錯。作為律師嘅佢提到社會而家畀法律籠罩一切生活，「唔希望乳鴿……野鴿都同樣受人類咁多問題」。佢希望當局喺執法上提供長啲嘅寬限期，因為刑罰都幾嚴苛，將最高刑罰由1萬蚊提高到10萬蚊同監禁1年。
有關法案委員會主席、民建聯新界東南議員李世榮會後見傳媒，話喺將軍澳坑口曾經見到因為有過百隻野鴿，令小朋友驚到喊，街坊都要兜路行，佢話今次通過修例只係起步，希望政府有措施引領野鴿去大自然棲息，減低滋擾問題。
另外，今次大幅提升罰則。李世榮擔心遊客唔清楚條例，建議喺陸路關口、機場，甚至飛機上廣播條例內容。今次修例亦涉及好多執法部門，李世榮建議各部門要有清晰嘅執法指引，提供培訓，達到執法一致。
李世榮促政府向遊客加強宣傳(陳芷晴攝)
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
