Ray Online｜劉慧卿帶徒弟參觀國安展惹爭議 解釋「唔同立場都要睇」
政府喺尖沙咀歷史博物館設立嘅國家安全展覽廳最近揭幕。連民主黨前主席劉慧卿都帶徒弟參觀，不過就引嚟民主派支持者嘅質疑，佢解釋一向覺得唔同立場都要睇。
劉慧卿喺社交網站分享同4位徒弟同年輕朋友參觀國安展，佢打卡嗰陣仲面帶笑容。有網民就留言問「卿姐去攞景定贈慶?」，又話「笑得真開心」、「識時務者為俊傑」。劉慧卿回應傳媒查詢話，先前睇新聞見到國安展覽開幕，以前冇類似展覽，覺得都要關心吓國安。問咗徒弟之後，知道佢哋都有興趣就一齊去。劉慧卿話一向覺得唔同立場都要睇，例如以前都會出席建制派舉辦嘅講座，但唔代表去「背書」。
李永達留言幫手講說話
劉慧卿冇喺社交網站直接回應網民質疑，不過已經移居英國，退出咗民主黨嘅李永達留言幫手講說話，話參觀展覽唔等於改變立場，呢種立論過分簡化。按呢種邏輯，買內地產品就等於支持共產政權。其實可以有另一個角度，劉慧卿帶學生參觀展覽之後，可以作批判討論，比一般想像性討論，係一個更好嘅教材。
