Ray Online｜旅發局以1.35億元推「全新禮貌運動」 及拍真人騷推廣好客之道
香港力谷旅遊發展，旅發局會用1.35億推出「全新禮貌運動」，鼓勵業界、社區同公眾發揮好客精神、做好東道主角色，幫業界因應全新旅客群組同出遊模式嘅轉變，打造更有吸引力嘅旅遊產品，提升旅客體驗。
拍真人騷推廣好客之道
旅發局向立法會提交今個年度嘅工作計劃，全年市場推廣預算係11.24億，當中1.35億有關「全新禮貌運動」，不過未有詳情。另外，旅發局話會透過唔同活動推廣好客之道，例如最近拍咗真人騷，已經為活動打響頭炮。文件冇將真人騷開名，不過相信係「香港開電視」嘅《臥底服務團》，節目主持化身導遊同領隊，親自操刀炮製多條具香港特色嘅旅遊路線。節目邀請香港同內地旅遊網紅參加，成為服務團嘅神秘顧客，體驗食、玩、買、住4大旅遊重點。
