Ray Online｜百人歡送風波民政專員黃智華深造歸來 平調環保署助理署長負責廢物管理
前黃大仙民政事務專員黃智華上年出發去北京深造之前，有地區人士幫佢擺43席歡送晚會，引起社會批評。事隔1年，佢學成歸來，平調做環保署助理署長，專責廢物管理。
新職位下，黃智華嘅職級頂薪點係月薪21.2萬。主要負責推行廢物管理嘅政策、監督廢電器電子產品處理及回收設施(WEEE‧PARK)嘅運作、監督逐步管制即棄塑膠產品嘅工作等等。
黃智華當時致歉
黃智華喺上年9月去北京進修1年，當時黃大仙各界幫佢舉辦聯歡晚會，筵開43席，大約500人出席，大排筵席嘅舉動引嚟唔少批評。黃智華為餞別晚宴引起觀感上嘅問題致歉。不過連行政長官李家超都要回應事件，話舉辦歡送晚宴本身係好意，但引起負面觀感，應該以此為鑒。佢話將來可以寫信、傳送電郵、「拍下膊頭」表達謝意已經好足夠。民政及青年事務局局長麥美娟當時都話，有咁多人歡送黃智華反映佢得到地區人士認可，但希望地區人士以後「唔使破費，唔使客氣」，如果各界想鼓勵官員，「一封信已經夠」。
