蔡若蓮(右二)撈起炸完嘅笑口棗。(羅庸軒攝)
距離農曆新年仲有唔夠10日，教育局今日同傳媒舉行午宴，局長蔡若蓮就同幾位主要官員，一齊到中華廚藝學院整賀年食品笑口棗。佢哋4個人分工合作，由常任秘書長李美嫦、副局長施俊輝同局長政治助理蕭嘉怡分工合作，輪流負責每個工序。蔡若蓮就負責「埋尾」，上芝麻同放落油鑊炸成笑口棗。
食返自製笑口棗感到內脆外軟
蔡若蓮之後食返自己製作嘅笑口棗，形容真係好好食、內脆外軟，又話傳統中國人喺農曆新年應該放下假，自己就有上網訂個盤菜準備過年。佢祝大家新一年百毒不侵之餘，仲特別提到流感肆虐，不忘呼籲大家記得要打流感疫苗。
另外，李美嫦今年將會退休，佢話1988年加入政府至今，已經第三次返嚟教育局，對於見證教育界發展感到欣喜，包括本港有5間百強大學，一直都想推動嘅職業專才教育同國際化都做得到，依家已經諗定好多嘢想喺退休之後做。
會員免費換香港麥當勞叔叔之家慈善基金「愛❤迎蛇年利是封」及揮春！
