Ray Online｜蕭澤頤帶領少年警訊上東莞交流 與團員「食雪條」(少年警訊Facebook)
警務處處長蕭澤頤帶領32個少年警訊成員去東莞同深圳進行兩日一夜嘅交流活動，喺尋日東莞行程，一行人參觀咗東莞松山湖華為總部，喺社交網站帖文所見，成班團友把握機會同「蕭Sir」自拍留念，蕭澤頤喺聚餐時間同一班後生仔坐埋一枱，見佢哋一邊食一邊傾得好開心。
行程入面，團員乘搭咗貫通華為總部嘅交通工具，電動小火車，見到蕭澤頤同大家食雪條，好滋味咁呀。當然唔少得正經嘢嘅，團友話坐小火車遊覽總部內嘅歐洲小鎮園區期間，認識到小火車採用嘅華為先進快速充電技術，喺到站8至10秒嘅時間內充電，就足夠續航一公里以上。
少年警訊團員了解華為最新科技
一行人仲參觀華為健康運動科學實驗室，了解最新科技點樣應用喺唔同運動訓練範疇上。之後就去咗參觀華為三丫坡圖書館，另外，少年警訊成員亦參觀咗華為企業業務及網絡安全展廳，了解最新科技點樣應用到唔同行業，仲睇到唔同通訊科技範疇嘅最新發展，同埋未來最尖端嘅科技應用，亦了解到網絡安全嘅重要性。
今日一眾團員就會轉到深圳繼續一連串精彩嘅活動，叫大家記得留意佢哋嘅「Update」咁話喎！
