近40個EO一朝早就搭高鐵出發去武漢。(政府新聞處)
接近40位嚟自二十多個政策局同部門嘅行政主任(EO)，今朝齊齊搭高鐵去武漢，參與香港政府同武漢大學合辦、第一期「行政主任內地考察課程」嘅開學禮，之後就開始五日四夜嘅考察交流同課堂學習，了解國家最新發展同新時代重要治國方針、政策。
EO喺政府內部起關鍵作用
公務員事務局常任秘書長梁卓文同一般職系處長陳信禧，今朝就負責帶團搭高鐵。梁卓文喺開學禮致辭就話，EO係港府嘅專業管理人員，負責管理政府內各方面嘅資源及系統，兼且喺落實政策、推行公共服務等起到關鍵作用，所以政府好重視EO嘅培訓同事業發展，希望學員之後將學到嘅用喺工作上，回饋社會，貢獻國家。
課程由香港公務員事務局同武漢大學共同籌劃，仲獲得國務院港澳辦大力支持，內容涵蓋新時代綠色發展、數字技術賦能國家治理同區域協調發展等主題。一眾EO學員除咗可以深入了解當地最新發展、同有關機構人員分享同交流經驗之外，仲會喺武漢大學校園上堂，認識內地國情和了解武漢都市圈發展規劃，公務員事務局仲話出年打算繼續開辦課程㖭！
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
