Ray Online｜鄧炳強揸直升機 指「不知不覺好入神」(鄧炳強Facebook圖片)
保安局局長鄧炳強早前去到飛行服務隊嘅模擬飛行訓練中心視察，仲上載咗自己嘅「英姿」到社交網站。佢話模擬飛行訓練中心有好多最新嘅飛行救援技術，仲見識到特別訂製嘅空中巴士H175直升機模擬飛行訓練器，係目前全中國唯一一部歐洲航空安全局認可嘅飛行模擬器，根據飛行服務隊現有直升機型號1:1改裝，大大提升培訓水準之餘，飛行員唔需要再遠赴法國先可以參加培訓。
鄧炳強親身上陣 體驗直升機模擬訓練
除咗聽專業人士講解，鄧炳強當然唔少得親身上陣，有難得機會體驗一次模擬訓練。佢話雖然只係模擬，但體驗非常逼真，自己不知不覺變得好入神，見到相中嘅佢，即使係背影都睇得出佢好認真啊！鄧炳強話明白到飛行員喺空中面對唔同狀況，實在要有好優秀嘅技術同應變能力，而且空中拯救責任重大，仲話更加為香港擁有一支專業嘅空中拯救隊伍感到驕傲。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
