北區醫院中央廚房早前應承北區民政事務處，幫手提供飯盒畀緊急庇護中心居民。(民政事務總署FB)
香港過去兩個月先後遭受惡劣天氣影響，包括颱風蘇拉同世紀暴雨，民政事務總署上月開放嘅聯和墟社區會堂緊急庇護中心，更一度收容超過220名居民。醫管局嘅北區醫院中央廚房當時亦有出一分力，化身限定「Deliver北」支援北區民政事務處，為入住緊急庇護中心嘅居民提供三餐。
民政事務總署噚日(11號)喺社交網站分享過程，話醫院廚房當知道要為長者提供膳食，特別準備咗方便長者進食同適合糖尿病人食用嘅飯餐，仲喺餐盒底放熱水為飯餐保溫。
廚房每日烹調4噸食物
北區醫院嘅中央廚房除咗為醫院供應三餐之外，原來仲有為新界東聯網醫院、黃竹坑葛量洪醫院提供膳食。廚房每日烹調嘅食物達到4噸，而且恆常預備足夠3日嘅食材，同埋可以將食物煮熟後包裝同急凍，保存飯餐質素，難怪暴雨期間為220人提供早晚餐都遊刃有餘！
