淡水巴西龜在海中被海草糾纏 市民疑善信「放生」入海報警（fb「筲箕灣西灣河關注組」圖片）
胡亂放生還是做功德嗎？一名巿民昨日（10日）下午在鰂魚涌寵物公園對開海面，發現一大片海草載浮載沉，不斷被海浪拍打向岸邊，該名市民於網上發帖文指，「睇真啲，原來有隻巴西龜纏住咗，郁唔到，嚇到我一度以為佢已經死左（咗）。」由於該隻巴西龜無法游走，他一心想將巴西龜救起，於是致電愛協求助，但愛協職員回應指未能即時派人到場打撈，建議他報警求助。
市民：佢求生意志好高
與此同時，他發現巴西龜的頭部浮出水面呼吸，看到巴西龜仍然有生命，「真心勁激動，佢仲生存緊！」於是立即致電報警求助。約10分鐘後西灣河基地水警接報後乘輪船到場，但由於船的衝力大，令巴西龜跟水草一同向下沉，「嚇到我以佢係咁先，點知佢求生意志好高，過咗一陣之後游返上嚟」，水警們經過一番努力，亦成功伸長鐵杆用網將巴西龜撈起。之後亦向他交代最新情況，又指已將巴西龜送往薄扶林漁護署動物管理中心，案件交由柴灣分區跟進。
巴西龜懷疑遭人放生
他表示感謝水警幫忙，又表示由於擔心限期內無人認養，巴西龜最終難逃一死，因此決定自行聯絡漁護署接走該頭活龜，但因自己養龜經驗不足，呼籲有意領養的人士與他聯絡。
因鰂魚涌寵物公園鄰近的北角碼頭為放生海鮮的熱門地點，他懷疑巴西龜遭人「放生」到海中，又呼籲「請唔好再放生任何動物，你乜都唔做先係功德無量，一條生命爭少少就死咗喺你手上！」網民亦怒言「淡水龜掉落海，等同謀殺沒分別！」、「放生唔用腦」、「放生等於造孽！領養才是造福！」，又有不少網民留言感謝他救了一條生命。
