![羅淑佩(左一)日前去睇首場Ian個人演唱會,仲同觀眾之一李國章(右一)等人合照。(羅淑佩FB)](https://cdn.am730.com.hk/s3fs-public/styles/article_image/public/2024-07/guj6upgcibyq.jpg?itok=AFvZD9fW)
羅淑佩(左一)日前去睇首場Ian個人演唱會,仲同觀眾之一李國章(右一)等人合照。(羅淑佩FB)
男團MIRROR成員陳卓賢(Ian)舉行一連7場首個個人演唱會,房屋局常任秘書長兼房屋署署長羅淑佩作為忠實支持者「Hellosss」,在第一晚演唱會便已入場捧偶像場。佢睇完演唱會之後凌晨1點幾喺社交網站出Post,大讚今場演唱會「真心好聽,真心好睇,真心喜歡」,形容呢場係「作為粉絲真心滿足的一個音樂盛會」,「感謝唱作歌手,在台上閃閃發光的Ian Chan!」
大讚日前鄭秀文演唱會氣氛超級好
羅淑佩貼出多張Ian台上表演嘅相片同片段,其中一幅係佢同佢送出嘅花牌合照,上面就寫住Rosanna Law(羅淑佩英文名)祝福Ian「Good Show!」。另一幅合照入面,就同時見到行政會議成員李國章,唔知佢係咪陪太太嚟支持Ian呢?
另外,羅淑佩早幾日亦都有睇歌手鄭秀文演唱會,佢形容鄭秀文果然如報道所言狀態大勇,揮灑自如,仲話下半場其實是歌迷們大合唱經典歌時段,大讚氣氛超級好!