網上熱話｜深水埗茶記推$20特價飯盒 6款口味可揀 網民：好過兩餸飯
近年兩餸飯開到成行成市，全因收費平，又多款式味道選擇。不過最近有網民發現，深水埗一間茶記的特價外賣飯盒只要$20！更有6款菜式可選，包括咖喱吉列豬扒、薯仔雞翼、香茅雞扒及魚香茄子等，不少網民有讚該店「有良心」，更揚言「好過食兩餸飯！」
圖片來源：香港茶餐廳及美食關注組 Facebook
深水埗$20特價外賣飯盒
近日有網民在Facebook群組「香港茶餐廳及美食關注組」發文，指深水埗元州街麥當勞斜對面的匯發茶餐廳，有特價外賣飯盒，只售$20，他更上載外賣飯盒餐牌，共有6款菜式可供選擇，包括咖喱吉列豬扒飯、薯仔雞翼飯、香茅雞扒飯、魚香茄子飯、榨菜蒸肉餠飯及肉鬆蒸水蛋飯，不過表明不包餐具及袋，大家去買記得自攜購物袋及餐具。
據悉茶餐廳位於深水埗元州街，開業已有25年。由飲食平台的舊相可見，該茶餐廳於2020年疫情期間，都有推出$20特價外賣飯盒，但只供外賣，堂食要正價。
網民大讚：好過食兩餸飯
對於超平飯盒，不少網民基本上都有讚無彈，大讚抵食，表示「平民區茶記有咁價錢簡直造福人群」、「睇留言。。。20蚊仲想點，兩個麵包空氣咁都廿幾蚊啦！」、「呢間好耐以前食三餸飯可以叫三隻雞比」、「無言，好過食兩餸飯！」、「20蚊一個飯盒而家真係好難有 一間食肆會賣咁嘅價錢，冇至少50蚊都咪使只意有得食」、「良心」、「呢間正，𡃁仔成日食，試過叫咖哩豬扒魚香茄子飯，非常特別」。
入App免費換走健康產品
