香港人出名工時長，與同事朝夕相對、日久生情變愛侶，即使未經歷過相信也曾聽聞。活在自由戀愛的時代，追求愛情本應毫無束縛，但場景發生在辦公室，情況就截然不同。前後腳返放工、偷偷打內線，甚或見到扮唔識……職場的愛侶，如果捱得過棒打鴛鴦的惡上司，又抵得住友人「見光死」的恫嚇，情路仲有咩好怕？
在互聯網同時搜尋「同事」和「拍拖」，搜尋結果有46萬個；若搜尋「同事」和「地下情」，結果則超過100萬個。數字除了反映網民關注「Office地下情」外，會否也顯示「地下情」是職場戀情的普遍共識？綜觀網民普遍同意，「同事變戀人，要低調進行」。不過有女性網民就憂慮，「同公司真係好煩，公開又死，唔公開又擔心(戀情)死。佢驚同事鍾意我，我又驚佢扮冇女朋友識女仔。」另有網民聲稱是男主角，「由拍拖、散拖到公司開拖，公司戀真係諗過先好……」有人總結，「始終工作地點，拍拖唔易公私分明，工作無利益衝突都好啲，如果同部門分手有排尷尬。就算一齊咗，最好一方都係諗轉工啦。」
職場變情場，管理層會如何看待？安俊人力資源顧問董事總經理周綺萍表示，「管理層一般都唔贊成啦，好結果嘅比例低，唔好嘅佔多數，有啲甚至會因而調開原來崗位……最擔心係干擾公司運作，涉及感情好難理智，會唔會偏私呢？晉升會唔會唔公平呢？散咗又會影響同事，萬一到時兩個都唔做，對公司損失仲大。所以即使係拍拖，都係地下情啦，管理層唔知就唔會干涉，就算散咗大家又可以當無事發生，避免尷尬。否則，當事人都覺得全公司望住自己啦。」
緣分找上門始終難以阻擋，如何後續應對也是關鍵，職業心理學家陳曉翎認為，「同同事拍拖，最緊要盡量規避、公私分明。同事戀好易成為辦公室焦點，稍有不慎很容易成為話柄，尤其戀情曝光初期，要認真工作，公私分明，切忌公開親暱。同時，避免將兩人之間嘅糾紛帶入辦公室，亦唔好因為拍拖而冷落其他同事，畢竟商業社會著重人際關係，好多行情資訊都要靠同事，就算熱戀都要保持專業。」她又特別提醒：「正常同事關係的人際安全距離為10至45厘米。」
「Office戀」網民正反辯
贊成
‧早早返工，唔願收工，病假都請少啲。
‧公司大把couple都無事，搵同事做partner點都穩陣過上網識人。
‧同男友唔同部門，拍拖反而加強合作，公司知道都無嘢啊。
反對
‧日對夜對一定厭，做緊嘢個樣仲要勁樣衰。
‧好多流言非(蜚)語，唔係人人受得到，分咗手仲尷尬。
‧散咗真係好難受，日日仲要見到嗰個人，自此唔敢同同事拍拖。
立即更新/下載AM730手機APP 體驗升級功能
