升職受許多因素影響，並不一定論資排輩「先到先得」，遇上昔日同事兼老友「遲嚟先上岸」，難免內心泛起波瀾，在朝夕相見的辦公室中應如何面對？另一邊廂，獲得升職本是開心事，卻遇上前同事「恃熟賣熟」，又如何履行管理工作？有專家建議，關鍵還是當事人調整心理。
比冇職升更令人難過的事，可能是年資較淺的同事升職，成為新上司。有打工仔在網上抱怨：「同個後生同事一直有講有笑、成班人食飯happy hour，點知過年後，公司升佢職變我老細，自此(佢)變咗第個人，唔識人咁。」有留言表示感同身受：「我都試過，搞到我喺公司好尷尬，好似提醒我好失敗咁，之後做多半年就辭職。」亦有人認為：「如果兩人關係融洽，可能做嘢仲輕鬆。更何況風水輪流轉，第日做番佢上司都唔出奇。」有人則提出：「我係調番轉，升咗職但指唔郁班『老鬼』做嘢。」
安俊人力資源顧問董事總經理周綺萍表示，職場不乏同事變上司例子，「下屬角色被動，如果新上司想公事公辦、保持距離，下屬都無法『監硬嚟』，唔通話佢『升咗唔識人』咩？下屬要明白，新升職會有一定壓力，包括點樣處理公司嘅人際關係，下屬只能配合。」她建議給予對方時間，「新上場可能想下官威；亦可能係想分清楚人際關係，好多時上司要嘅係公私分明：公事上要尊重；私底下可以友好。加上職場環境有啲嘢係要分清楚，唔好俾人睇到『冇大冇細』；亦唔想俾下屬有特權咁『恃熟賣熟』。」
至於要面對『老鬼』的新上司，周綺萍建議以朋友關係出發，「一般上司都希望同同事保持友好關係，特別係已經做幾年同事以上，都唔會想因為升職就無晒朋友。遇上同事不合作，最好先用朋友關係同佢解釋處境，例如『要同大老闆交代』，等對方理解身份地位唔同咗，好過一開始就『擺官威』。以朋友身份解釋無效，先返公司用上司角色處理。」
職業心理學家：關鍵在調節心態
職業心理學家陳曉翎認為，「如果兩個人都有爭取過同一職位，成為下屬一方難免自尊受傷。因為身份改變而覺得不自在，最重要係調節心態，接受角色改變嘅事實。理想情況下，可以主動邀請新上司，一齊討論大家期望嘅共事模式，咁可以表明接受同信任佢嘅權威。作為下屬亦應該為對方著想，協助對方適應同履行新工作。」她續指，「高壓式管理」源於上司的不安感，若遇上「變臉唔識人」的新上司，「下屬應該『多同情，少挑釁』，情況許可的話，可以坦率同對方討論新工作嘅壓力。」
立即更新/下載AM730手機APP 體驗升級功能
