「恭喜發財！」新年假期後的第一個上班日，無心工作指數爆燈，對未婚一族來說，復工日唯一動力可能是逗利是。不過，一封利是牽涉的職場倫理並不簡單，已婚人士派利是予未婚者，似是傳統習慣，但已婚下屬遇上未婚上司，這封利是派好唔派好？未婚的老闆又應否「慳得就慳」？
上司下屬關係與傳統習俗出現抵觸，將變成職場難題，有已婚人士在網上論壇求教，指「上司未結婚，我使唔使派利是俾佢？」網民反應不一，有人認為「少少都要派，始終結咗婚要派俾未結婚。」有人則堅持「梗係唔使，上司應該派俾下屬。派俾老細反而似擦鞋巴結；到時以為你串佢未結婚仲弊。」有網民則反問，「咁又問唔問番佢(未婚上司)攞開工利是啊？」另有網民分享，「利是都係意頭，最睇唔過眼啲同事，私下比較人哋封幾多，好似人哋奉旨要俾錢佢哋咁。」
留意公司文化
下屬是否需要向未婚上司派利是，循道衛理輔導中心輔導主任方健貞認為，首要留意公司文化，其次是兩人交情，「如果兩人通常只有工作關係，口頭恭喜已經足夠，甚少上司會怪下屬唔俾利是；倘若兩人一向熟絡，關係融洽，派利是唔會唐突，情況就唔同。」至於未婚上司應否派利是，她認為並非必須，「不過，如果想同下屬或員工唔止工作關係咁簡單，仲係一齊打拼嘅拍檔，派利是或請食嘢等方式，都可以增加員工歸屬感。」她又強調，「新年派利是始終係一種傳統祝福，無論上司定下屬，祝福對方都係好事嚟。」
安俊人力資源顧問董事總經理周綺萍認為，「不同公司有不同文化，不能一概而論，最好都係參考同事做法，初嚟報到嘅員工，可以先打聽同事。一般而言，下屬會同直屬上司拜年，老闆通常都會主動派利是嘅。」她又補充，「有時大公司部門多，難免會有員工比較多名主管所派利是的金額，上司最緊要都係睇自己財政狀況，有派就係禮數，通常唔少於20元都得啦。」
開工利是幾多錢？
除了來自上司的利是，復工日通常還會收到公司的「開工利是」，金額多少按行業和公司規模有所不同。有中小企商會表示，今年的開工利是一般由100至500元不等，員工較少的小企業，利是金額通常較高；另有統計顯示，一般辦公室員工，今年開工利是以20至50元佔多數。
立即更新/下載AM730手機APP 體驗升級功能
