隨著PlayStation 5(下稱PS5)即將於下月19日上市，近日海外媒體陸續釋出大量開箱片供機迷大飽眼福，認真熱鬧！當然小編亦唔執輸，搶先全球實機試玩首發作《Sackboy：A Big Adventure》，體驗PS5強勁效能之餘，也驚嘆DualSense的精妙手感！唔講咁多，即睇評測！
PS5將於下月19日上市，光碟版售$3,980。
今次實機試玩3款動作解謎遊戲，包括搶先全球亮相，跟PS5同日上市的《Sackboy：A Big Adventure》、已預載於主機內的《Astro’s Playroom》，及明年3月26日上市的《巴蘭的異想奇境》。先講較出名的《Sackboy》，遊戲可說是《小小大星球》系列的續作，玩家以DualSense操縱麻包袋人偶Sackboy，支援雙人協力遊玩，考驗眼力和方向判斷展開冒險。小編以4K畫質實測，發覺畫面細緻度比PS4高出不少，尤其從Sackboy身上的麻布粗糙質地特別明顯，場景的光影和繽紛色彩流暢自然，載入關卡和過場畫面亦喺2至3秒完成，相當快速。由於遊戲著重體感享受，當按「O」鍵滾動角色或「L2/R2」跳躍或攻擊敵人，DualSense的震感比DUALSHOCK 4更具指向性、反映強弱和延續感，觸感相當立體，加上握把的磨砂質感，觸控板又容許雙指操作，超級好揸手！
至於《Astro’s Playroom》可謂官方「賣大包」的免費驚喜，首先遊戲毋須像前作《Astro Bot Rescue Mission》般要佩戴VR眼罩遊玩，而且隨機已預載其中，直接開機即玩。遊戲提供25關，玩家操作機械人仔Astro Bot收集PS金幣和拼圖碎片，解鎖粉絲最愛寶物，到底係咩？賣下關子，等大家發掘！最後一款《巴蘭的異想奇境》屬於Square Enix出品，攻略過程中玩家可為角色換裝改變異能，又對應雙人協力黐實同伴破解關卡，合家歡一流。
畫質超細緻，Sackboy身上的麻布粗糙質地特別明顯。
預載主機內的《Astro’s Playroom》，開機即玩。
講返主機，小編第一個反應係「勁大件」，有指直立擺放較PS4 Pro高出不少，如果家居空間有限，可嘗試將主機橫放安置於電視背後。各位或會問：「咁大部做乜？」其實是為了應付AMD Ryzen Zen 2晶片、對應最大頻寬達448GB/s的16GB GDDR6記憶體，以及825GB SSD高速存取的高負荷運作。機身除採用液態金屬協助部件冷卻外，也全靠機頂內藏直徑120毫米，厚達45毫米的巨形雙面散熱扇，否則肯定會過熱Hang機。至於光碟版主機選配吸入式Ultra HD藍光碟機，嵌入雙層避震墊，Load碟時噪音勁低。不得不提，主機和手掣均內藏「彩蛋」，細心看原來磨砂表面由無數個「🛆、O、X、口」標誌拼湊而成，夠晒驚喜。PS5內外誠意滿分，可謂「大件夾抵食」！
外媒直立擺放，目測PS5較PS4 Pro高約四分一。
DualSense的立體震感比DUALSHOCK 4更優秀。
開機時機頂兩側散熱槽會透出藍光。
入App免費拎23大商場蛇年利是封
