2018-02-20 11:46:00

【四冠夢碎】曼城負英甲韋根足總盃出局

英超差不多封王，歐聯好大機會打入8強，今個周日聯賽盃決賽鬥阿仙奴嘅英超一哥曼城，喺周一晚足總盃第五圈作客以0比1不敵英甲嘅韋根，四冠夢碎。曼城領隊哥迪奧拿收起中場迪布尼，全場依然取得壓倒性優勢，可惜左閘戴爾夫喺上半場補時雙腳飛剷對方球員，最終被球證出示紅牌直接趕出場，曼城喺下半場少打一人。

到咗79分鐘，後備入替嘅曼城右閘基爾獲加犯錯，韋根射手基歷治一射破網，最終以一球淘汰曼城。值得一提，曼城前鋒阿古路賽後涉嫌出手打韋根球迷，可能被英格蘭足總秋後算賬。