年紀唔輕，仲想長玩長有，更要注意健康；飲食習慣外，運動唔可以缺少，長跑更係小弟多年至愛。啱啱又報咗明年大型銀行搞嘅馬拉松，希望有關當局開放更多名額，抽中嘅人多啲，鼓勵多啲人有目標去做運動，養成良好習慣，呢個先係抗疫最佳良方，助人助己。
講返世盃，打成個月，對比現今分分鐘一日開盤成百場波、走地又當道嘅投注世界，已經係長途賽。長途賽同長跑一樣，要有好充足嘅準備、策略同理想嘅臨場發揮，先有好回報；點解世盃冠軍近幾十年冇爆過冷，都係呢個原因，路遙知馬力。你只係睇下巴西啱啱選嗰26人名單，真係喪勁，拆開AB隊分兩隊踢，都會係爭霸熱門。好多人話佢哋後防多老餅，但你唔係諗住堂堂森巴雄師以守為攻啩，除咗前鋒尼馬外，我波神大膽講冇人喺隊內敢講自己係必然正選，有機會落到場，仲唔搏到盡；而且中前場實在太強，踢分組賽，就好似先跑完半程馬拉松，呢隊波唔使留力，Ｇ組首名，大熱穩開。
塞爾維亞有力出線。（路透社）
足球，我好信數據，長期又穩定就唔敢逆向思維。雖然巴西對上一次攞冠軍係2002年，之後4屆全部三甲不入，但合計呢5屆佢哋全部小組首名出線；今屆Ｇ組對手係兩支二線歐洲隊瑞士、塞爾維亞，同埋對上4屆兩次唔入決賽周、兩次小組全敗包尾嘅喀麥隆。有貨賣唔使就住踢，巴西球星輪住踢都夠直落贏3場，點會怕首名晉級，最緊要做好爭霸氣勢，獅子撲兔格，準決賽就算遇阿根廷都唔怕。博次名，我唔會揀有老態嘅瑞士，分組賽賣點係鋒力行先，塞爾維亞勁多當打兵又有「前鋒雙霸」阿歷山大米祖域同杜辛華荷域；第一場就算輸畀巴西，之後掃低其餘2隊，呢條「巴、塞」Q有2.75倍，抵玩。
荷蘭要首名出線不難。（資料圖片）
另一組我博睇波至愛、以往盛產名將嘅荷蘭，近5屆連同上屆雖然有2次入唔到決賽周；但其餘3屆有2次攞小組首名、1次第2，最後仲攞到1亞1季，唔輸蝕巴西嘅「半馬之王」。「橙軍」今屆A組對住主辦國卡塔爾、南美二線兵厄瓜多爾同啱啱冇咗「非洲天王」文尼嘅塞內加爾。呢班「荷蘭橙」近年喺外圍賽同今年歐國聯已發狂係咁入波，贏波率極高；最緊要班波除咗利記中堅VVD外，冇乜大哥，小將博上位中，唔會再玩內訌，贏冠軍就難啲，虎入羊群，先博一條「巴、荷」首名互串，再揀卡塔爾做A組次名同荷蘭串Q，落緊飛有6.2倍啱數。主辦國近屆除咗南非外，其餘全入次圈，自己整冷氣球場喎，你話邊個最先適應呢？
想跑好一個「全馬」，真係要有充足準備，為咗令自己更努力練跑，先報咗下月一個半馬比賽，俾自己練好條氣，向更遠嘅路進發。逆天行話恨贏錢請食鵝媽卡些；我嚟緊為比賽，就連啤酒花生送世盃都唔多敢，博半程2組首名同2條「連贏」收錢先，入貨多掃幾枝至愛嘅鮮榨橙汁，賀愛隊「荷蘭橙」入淘汰賽繼續走遠啲，人生心足啦。波神
冷敲哥斯達黎加食「鵝媽卡些」
嗰日晏晝我經過加連威老道，見到成條街十室九空，但係轉角位一間兩餸飯就超多人排隊，仲見到經紀陳喺度買緊飯。佢認得我，仲好唏噓咁同我講，話佢已經6個月都冇開單，遲啲真係兩餸飯都食唔起。
我就勸佢，唔好咁悲觀，做人要向前望。無論一個人同一個城市，有危就有機，絕處可以逢生嘅。你睇上年，個個都跟「木頭姐」買科技股；或者誤信成日做某財經雜誌封面嘅師奶偶像「方向叔」買股票，你今年就真係要一碟兩餸飯分開兩餐食。反而03年沙士同08年金融海嘯，IFC天台排晒長龍，人人最灰嘅時候，反而就係入市機會。所以阿叔最相信就係「相反理論」。呢個世界點運行，唔係一般凡夫俗子可以諗得到嘅。
哥斯達黎加有力爆冷。（路透社）
好彩就快到世盃，大家可以放低殘酷嘅現實，轉移吓視缐。大家唔知有冇留意，歷屆世盃分組賽爆冷好多，去到十六強之後相對較少。點解？第一，強隊分組賽唔使每一場搏盡，其實攞第二都可以出線。另外一個原因就係啲強隊例如巴西、阿根廷、德國、法國等，佢哋啲球星係五大聯賽主力，喺所屬聯賽同歐聯都搏到殘晒；而且佢哋梗係最後一刻先返國家隊集訓，頭幾場都尚未磨合，專注力又不足。反而一啲二、三缐國家隊，世盃就係佢哋球員搏上位嘅舞台，仲唔同你搏盡？所以你睇上屆德國可以輸比泡菜0比2，阿根廷就被克羅地亞炒3蛋。所以分組賽係爆冷溫床，呢個亦係我逆天行搵食之時。
天行喺度介紹一支係分組賽實力同賠率錯配、冇乜人留意嘅「優質股」俾大家；呢支就係喺2014年先後壓過烏拉圭、意大利同英格蘭，以小組首名晉級嘅神奇球隊哥斯達黎加。呢支球隊當年仲淘汰埋希臘打入8強。最後同荷蘭激戰120分鐘，互無紀錄，只係互射12碼被淘汰出局。
呢支係世界排名第31嘅中美洲球隊冇咩叻，最叻一招叫做龜縮神功。喺今屆世界盃外圍賽14場中，有9場都係一球上落，現役國家隊球員好多都仲係14年國家隊嘅功臣，依啲球員名不見經傳，最為人熟悉當然係現効力PSG嘅鋼龍拿華斯，同埋曾經打過阿仙奴嘅祖爾甘保，仲有而家打緊新特蘭嘅18歲新星左翼賓尼迪，上位靠今鋪。呢次哥斯達黎加又被編喺死亡之組，同組有德國、西班牙同日本，呢啲亂局就最啱佢偷雞，只要佢贏咗同級對手日本，對西班牙同德國比佢哋是但偷到一場雞。隨時繼14年後又再次爆出小組冠軍150倍嘅驚天冷門。你冇睇錯，只係小組冠軍都有150 倍，呢啲就好明顯就係開錯賠率。搵佢做膽拖埋西班牙同德國出線係接近200倍。中一次都真係有今生無來世。中咗嘅話，経紀陳，天行應承你，請你食鵝媽卡些！逆天行