2023年度叱咤樂壇流行榜頒獎典禮預測｜Lolly Talk或踢走MIRROR COLLAR ERROR 晉組合獎三甲？
商台舉辦的《2023年度叱咤樂壇流行榜頒獎典禮》（簡稱叱咤2023），以歌曲播放率計算嘅獎項就快截數。當中叱咤樂壇組合大獎結果或者會出人意表，因為ViuTV/Makerville旗下三隊人氣組合Mirror、 Error 及Collar隨時三甲不入，反而Lolly Talk呼聲不低。
叱咤樂壇流行榜頒獎典禮 Lolly Talk有2首冠軍歌
若然以今年登上903專業推介嘅歌曲成績計算，暫時擁有兩首冠軍歌嘅組合有Dear Jane、RubberBand及Lolly Talk。而人氣旺盛嘅Mirror今年竟然仲未有冠軍歌，上榜歌亦只有2首（Sheesh、Catch a Vibe），以播放率計比各有一首冠軍作品嘅同門 Error及Collar遜色，未知係咪因為MIRROR早前聲稱未必出席叱咤有關。
而同樣出道兩年嘅兩隊女團Collar及Lolly Talk 當中，Lolly Talk除咗兩首冠軍歌之外，另外兩首作品都打入十大，Collar就有一首冠軍歌及兩首三甲作品，由此推算Lolly Talk播放率應該稍為佔優，並有望擊敗三隊同樣來自《全民造星》嘅組合打入三甲。
▼Lolly Talk演唱會靚相重溫▼
Dear Jane成叱咤樂壇流行榜頒獎典禮 組合金獎大熱
至於2023年度叱咤樂壇流行榜頒獎典禮我最喜愛的組合三甲排名方面，有兩首半冠軍歌嘅Dear Jane（與盧瀚霆合唱Money播放率計一半）暫時而言相當有機會奪得組合金獎。而RubberBand全年派台歌有三首，論數量比Lolly Talk輸蝕，因此銀獎得主相信會係Lolly Talk，RubberBand拎銅獎。
原文刊登於 Yahoo 娛樂圈
amJetso 送BIODERMA救星小紅瓶🩷護膚恩物 立即按此參加👇
