![](https://cdn.am730.com.hk/s3fs-public/styles/article_image_with_watermark/public/2023-05/HANAKUK.jpg?itok=Fn59DFNg)
菊梓喬早前澳門開騷發生意外,令耳膜受損,她表示當時最緊張的是臨場表現,怕唱到走音。
菊梓喬(Hana)自何哲圖離開,炎明熹、姚焯菲等加入無綫之後,「星夢一姐」沉寂下來,過去包辦多部無綫劇集主題歌的她,作品也變得愈來愈少。不少人以為Hana的星途開始走下坡,甚至一度把她列為「失蹤人口」。然而,Hana不覺自己被消失,只是忙於登台,又要籌備本月20日至21日舉行的個唱,以及有些新想法,希望未來能令大家可以重新認識Hana。
Hana於2016年以唱作女歌手出道,轉眼已經7年,她稱這7年過得很快,因為疫情,亦終於換來一個放假的機會。「真係好短!我真係好耐無放過假!由一出道就係咁做,依家轉眼又話要開演唱會啦!其實我唔覺自己消失,以前出歌每一、兩個月出一首,出到好密,依家隔耐啲出歌,就話好耐冇出,係咪消失咗。」她自言如今對自己的事業有不同的看法,希望大家不要以為她只會賣慘。
![](https://cdn.am730.com.hk/s3fs-public/styles/article_image_with_watermark/public/2023-05/HANA%20KUK2.jpg?itok=SN0Szst4)
現實中的菊梓喬跟螢幕上的她大同。
順應民意唱慘情歌
「今次演唱會我參與度多咗,以前係公司安排好,我企上去唱就得,依家我好多部份有參與,大家開會時發現,原來我唔係大家想像中好靜的一個人。」她稱大家愛她唱慘情歌,公司亦「順應民意」,令她真實一面未能展示出來。現實中的她,非常愛說話,連她也笑言與普通師奶無異,「我好愛行街市買餸、洗衫煮飯,又唔會化妝,真正嘅陳曉怡係唔好睇,但Hana就化妝到靚靚。」陳曉怡是Hana的真名,她指相士批過原名比「菊梓喬」更可帶旺事業很多倍。不過,公司賜了這個名字,她覺得用不用真名也沒所謂。
過去7年,Hana的一切全都被公司安排,如今她希望是次演唱會令大家重新認識她,讓大家對她改觀,更自言希望有天可以到紅館表演雜耍,特別是要跳火圈。「我成日都同公司講想表演跳火圈,但一直被人ban!」為何不藉今次個唱嘗試,Hana笑言決定開騷的時間太倉促,不夠時間練習,再者希望這個項目可以在大的場館做。她透露新歌將在個唱後才推出,希望是把演唱會的延續下去才更有意義,不再是為出而出。
不介意作品變劇集歌
過去Hana的曲目大部份都是劇集歌,她從不抗拒,因為都是她由心演繹的作品。她說︰「有好多我自己寫嘅歌都變咗劇集歌,我係咪要周圍同人講『呢個係我個仔』呀!唔需要去標籤,歌迷鍾意就得!」她直言曾為網上的言論大受打擊,更換來無數個失眠之夜,自認火爆的她如今也化了,「我發現呢啲批評對我係冇影響,我唔會再一點就爆,如果因為咁影響情緒,唔值!我係要活好自己一生,創造自己嘅價值,應該係由我去定義生命意義。」
![](https://cdn.am730.com.hk/s3fs-public/styles/article_image_with_watermark/public/2023-05/HAHA%20KUK%204.jpg?itok=hzCX6TZO)
菊梓喬最希望有天可以在紅館表演雜耍。