193和Ash合作主持《撞鬼自駕遊》，遇到不少恐怖經歷。
ERROR成員193(郭嘉駿)向來作風大膽，初入行已自薦拍《入住請敲門》，繼在《花姐ERROR遊》勇闖自殺森林和犬鳴隧道，還拍攝了《克服他她它》，今年終於如願主持ViuTV靈探節目《撞鬼自駕遊》。早前他與Ash(鍾卓穎)越洋遠赴英國靈探，以自駕遊方式尋找當地各猛鬼熱點，實行與外地幽靈打交道。兩人日前接受本報訪問，大談千奇百怪的疑似撞鬼經歷，包括入住猛鬼酒店、古老城堡、怨氣監獄等，其中在陰森瀑布聞神秘女聲哼歌，最為驚心動魄，當Ash拍到屙嘔發冷，甚至要服用七師傅於出發前相贈的「仙丹」， 193卻愈戰愈勇，在節目內霸氣驅鬼，更揚言要挑戰靈異界KOL潘紹聰棒，與「小鬼女」Ash拍住上，接棒做「小鬼王」！
Ash神情有異疑撞鬼
193早前曾在IG Story直指新節目快出街，卻不見公司安排任何宣傳，他澄清並非不滿公司，反而是出道5年，感恩終能如願，盼更多觀眾留意新節目，皆因他與Ash親身體驗不少恐怖經歷，其中包括三大不思議事件。首先是他們入住猛鬼酒店，Ash一到埗就獨自走往最猛鬼的房間，而且性情大變，目擊過程的193憶述，他追上前敲門卻吃閉門羹，「我想睇吓佢間房有咩特別，佢好似唔想俾我入，好似收埋個人喺間房入面，只開一條門罅，夜晚化妝時佢就又屙又嘔。」最後點收科？結果當晚由193單人匹馬拍攝，Ash補充說，「後來我食了七師傅俾我哋嘅仙丹，慢慢就冇咩事。」
全隊一行七人慌失失
論到最恐怖事件，就是嚇到全隊人員好慌張的幽森瀑布，導演在拍攝期間竟聽到女聲哼歌，翌日他們補拍睇playback鏡頭時，竟再聽到女聲哼歌，而且與Ash疊聲，193表示，「大家都超驚超慌張！」其後，全隊一行七人帶同七師傳的「招魂/驅鬼蠟燭」返回事發地點時，他形容，「我未見過成隊都咁驚，一去到就上香，拍得超快，勁驚呢個地方。」第三個地點是怨氣監獄，他們帶同探靈工具同行，頻頻聽到發現靈體的「咇咇聲」，193憶述，「我哋萬一做咗佢哋(靈體)唔鍾意的行動就會響，例如掀起封住擺設嘅布，部機就即刻響，我問係咪唔想我哋喺度，部機更響得犀利！」
193唔搵七師傅 又關姜濤事？
經此一行，兩人可相信鬼神之說？193直言，「以前完全唔信，覺得見到鬼、陰陽眼，一定係精神病、疑神疑鬼，每一次去靈探都有解釋唔到嘅事，今次去咗咁長時間，發生咗咁多事我更加信。」Ash則表示，家人都遇過超料學體驗，今次終於輪到她親身體驗。至於兩人可擔心「帶鬼入境」？Ash坦言回港後有進行儀式，193則表示，本來想找七師傅，但見這幾個月也沒異樣，加上工作忙碌，遲遲未有行動，Ash苦勸，可能找了七師傅一切會更順利，193笑言，「若搵咗七師傅，我會變姜濤？」說到底，都係一句，信不信由你，觀眾自行判斷。
訪攝：Grace
193
髮型：Man Chan @CHIC Private I salon
化妝：Giann Cheung @Annie G. Chan Makeup Centre
型造： Lok Fong
服裝：MM6 Maison Margiela
Ash
服裝 : @aapestore #aape
髮型： Christy Li(muah)
amJetso 送BIODERMA救星小紅瓶🩷護膚恩物 立即按此參加👇
