在日劇《半澤直樹》扮演反派「大和田」嘅56歲日本男演員香川照之，3年前涉嫌喺夜場對陪酒女公關上下其手，受害人事後報警，但後來撤銷起訴。不過日本雜誌《週刊新潮》就大爆案情。
據報導，香川照之2019年7月去到東京銀座一間酒店同友人消遣，陪酒女公關入包廂招呼，香川照之居然伸手入女方上衣內，強行脫下對方內衣，仲將內衣傳俾同行朋友一齊索，香川之後更強吻女公關兼摸胸。受害人事後報警，並表示患上創傷後壓力症候群。
《六本木Class》再演反派
出道33年嘅香川照之，係日本戲劇界著名實力派，出身演藝世家，父親係歌舞伎演員，母親則是寶塚歌劇團台柱。香川畢業於名校東京大學，之後正式出道，第二年就有機會演出NHK大河劇，足證實力非凡。喺《半澤直樹》飾演大和田常務，更令香川照之人氣大爆發。亦因為呢套劇，香川片約不斷，導致同太太感情生變，最終離婚收場。而佢近期演出韓劇改編嘅日劇《六本木Class》，都係演反派。
原文刊登於 Yahoo娛樂LOL，am730獲授權轉載
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
