相隔20年，李克勤再與港樂合作開騷。
暌違6年，李克勤將於5月13至16日再踏紅館舉行「弦續李克勤‧港樂演唱會」，克勤在20年後再與香港管弦樂團合作，他特地移師到演奏廳，與港樂近60人大樂隊一起拍攝宣傳海報。克勤自爆由老婆盧淑儀揀衫，真空著西裝拍攝，他笑言起初還以為自己帶漏衫，但老婆話真空先至靚，「老婆話乜就乜啦……覺得入面涼浸浸咁。影嗰陣有工作人員竟然提我，李生你走光呀！哈哈....麻甩佬都有人提走光。」演唱會將於22/3優先訂票，29/3公開發售。
逾60人聚首拍海報
克勤於20年前曾經與香港管弦樂團合作過紅館的演唱會，如今再次相聚拍海報，為傳遞繽紛歡樂與濃濃友情，海報計設用兒時 玩具帶出由細玩到大的溫馨及歡樂，平日總是西裝骨骨、正襟危坐的管弦樂團，個個像小朋友一樣拿著玩具，與克勤你打我鬧的神態，都已經感受到這是一個演唱會。克勤興奮表示，「上一次合作已經係20年前。當年我只係7、8歲啦，哈哈哈…個種感覺係，你識個朋友二十年，再一次合作，大家無論係感情、功力上都有升華。」今次海報主要想表達音樂可有好嚴肅一面，亦可以好輕鬆快樂。
預告嘉賓來頭好猛
克勤直言，疫情之後，相信每一個對音樂有憧憬的歌手，好恨再一次做紅館騷，今次希望歌迷觀眾可以多些參予，所以已在社交媒體呼籲歌迷留言選歌，望以最勁管弦樂團合音樂，重新編排，為大家帶來震憾的音樂盛宴，「我地已經開始籌備緊好多新元素係個騷入面，呢輪日日開會，為個騷拍攝影片咁，都好忙下，自己操練就都係咁上下，我不嬲都大量運動，唔係打波就踢波，所以都唔駛點狂操。」問到演唱會會否有特別嘉賓，克勤就笑道，「有。其中一晚重會有一個來頭好猛嘉賓添，就睇下大家買飛買唔買得中啦。」
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
