林盛斌(Bob)今日在社交平台上載自己為3D 動漫連續劇《西遊》配音照片，他表示曾獲李居明贈過幾句，指他做與豬有關的事便會發達，今次能為豬八戒配音，阿Bob說︰「雖然未算真係做到豬八戒，但係聲音演繹都算係演繹嘅一種吖，唔好咁貪心，我當減一半哩，『好發好掂』嘅一半，都好精神吖！」
阿Bob今次為豬八戒配音。
今次為何選中 Bob 聲演豬八戒，Bob 笑謂沒有問過原因，但有件事他就很感恩：「而家有工開，做配音工作我又鍾意，以前自己做電台都係用聲音做嘢，又配過西片、港產片、日本電影，今次配《西遊》感恩係早幾年有機會認識李居明師父，佢話阿 Bob，你一定要做啲嘢同豬有關，你條命嚟，如果有機會做豬嘅嘢你會發，好掂架啦，最好拍《西遊記》做豬八戒。呢件事成日喺我腦入面，幾時有機會做《西遊記》同豬八戒呢？點知蕭定一突然打嚟搵我做豬八戒，嘩，今年行運啦！」
《西遊》中的豬八戒予人印象向來又懶又懦弱，Bob被問到以聲音演繹時會不會好考功夫，他卻說呢隻豬係不一樣，「豬八戒鍾意女，鹹鹹哋濕，呢樣同我差唔多，佢內心有啲軟弱，但錄音時其中幾集嚟晒料，做一個好勁好勁嘅強人，我係從來未見過咁威武嘅豬八戒。」
配音當日，老闆蕭定一到場探班，兩人互有交流，蕭定一提議 Bob 將角色加鄉音，Bob覺得效果非常好：「佢話豬八戒不如加少少鄉音，有啲黐脷筋，『大師兄』講『大師哼』，令到角色得意啲、立體啲，同其他主角有啲唔同。」他更笑言《西遊記》中個個人物都想做，但豬八戒係最得意嘅，「今次《西遊》入面我一定係做豬八戒，因為豬八戒個老婆好靚，身材好好架。」
amJetso 送BIODERMA救星小紅瓶🩷護膚恩物 立即按此參加👇
