李居明率領一眾老倌拜神，祈求演出順利。
玄學家李居明編撰的《新洛神賦》昨晚(7日)開鑼，他率領眾老倌︰龍貫天（旭哥）、鄧美玲及陳鴻進等拜神及敲鑼，祈佑演出順利，吸引近百街坊圍觀。有街坊指近年少見這類拜神，又可以見到李居明大師及旭哥等，因此非常興奮，更一度有街坊湧入採訪區，需要現場工作人員維持秩序，非常熱鬧。
龍貫天演鄧小平
李居明表示完成《新洛神賦》之後，眾人便要彩排兩部重頭劇《智擒四人幫》和《小平你好》。他指新光戲院不但會上演傳統粵劇外，還有近代史粵劇，非常受歡迎。他透露旭哥將會扮演鄧小平，而陳鴻進會反串做戴卓爾夫人。他指旭哥非常高大，而鄧小平真人並不高，他相信旭哥出場時會哄動︰「究竟點樣令佢演到鄧小平，就係將其他人墊高。」
李居明︰香港係自由開放
他稱《智擒四人幫》將於年底演出，明年便會公演《小平你好》，他指內容觸及一國兩制，還會重演戴卓爾夫人跣低那一幕。他直言劇本涉敏感話題是踩鋼線︰「係敏感，你話左閃右避李居明真係冇乜錯，但依家都冇咩人嘈過我，證明香港係自由開放，究竟我會點寫，你哋要入嚟睇！」問到日後會否考慮寫其他題材，他表示自己是寫喜劇出身，要寫套周星馳式喜劇是非常難。問到新年有何曲目上演，他說過年一定會有兩套傳統粵劇上演，包括《雙魚追夢》及《金玉觀世音》。
(左起)鄧美玲、李居明、龍貫天、陳鴻進。
演李居明劇本學歷史
龍貫天先後扮過不同知名政治人物，他表示最重要神態。他坦言透過近代粵劇令他學會更多歷史，「《智擒四人幫》入面原來好多事情我哋以前係唔知，原來第一個攞乒乓球世界冠軍嘅中國人，係住喺筲箕灣嘅容國團。無諗過係香港出現，如果唔係李居明個劇本真係唔知。」至於反串演戴卓爾夫人的陳鴻進，他表示要減30磅，之後學習如何跣低，他大讚李居明的劇本經常給予演員不同挑戰，很會創新。
李居明希望觀眾透過粵劇了解中國近代史。
新作提毛澤東「芒果信仰」
李居明提到創作近代史粵劇，希望讓觀眾多了解中國近代史，看完會回家上網尋找更多歷史資料。他又特別提到文革時代曾掀起「芒果信仰」︰「當年毛澤東送咗一個芒果俾一個紅衛兵，之後全國嘅人唔敢食，話係偶像嘅芒果唔敢食，個個當神咁拜，呢啲到時會擺喺《智擒四人幫》，仲會有江青係點，捉四人幫係點，林彪個仔要謀殺毛澤東又係點，到時擺晒落去，呢套係好有娛樂性嘅戲。」
李居明的新作《智擒四人幫》在連登引來討論。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
