湯令山Gareth.T先後推出《Boyfriend Material》、《勁浪漫 超温馨》等極受歡迎歌曲,被喻為「樂壇潛力股」。近日,有網民就以「依家潮流係咪興湯令山呢種壞男孩樣」為題發帖,隨即引起討論。
擅長作曲填詞兼唱歌嘅Gareth.T,年僅22歲就被姜濤公開點名,指Gareth.T係佢今年最喜愛的新世代音樂人,Gareth.T於早前獲衛蘭邀請成紅館個唱嘉賓,衛蘭直言欣賞對方。Gareth.T喺2018年以獨立歌手身分出發,由於大部分創作以英文為主,加上一口流利英文,令人誤以為佢係ABC;但其實佢係土生土長嘅香港人。有網民就喺帖文表示勁多女同事鍾意Gareth.T,又指Gareth.T畀人一種壞男孩感覺,認為呢類型先多女仔鍾意;不過都有網民覺得Gareth.T嘅才華救咗佢一命:「牙山IG勁多令(靚)女follow」、「柒柒地但才華搭救」、「身高同樣都冇乜特別但係出到嚟唱,壓到台,係型呢,女鍾意唔出奇。」等等,更有網民覺得Gareth.T嘅外貌似足蘇永康。
曾為姜濤MIRROR創作歌曲
Gareth.T自小學開始練習小提琴和鋼琴,因為一次學校嚟咗位英國老師而打開其音樂世界,慢慢地對寫歌產生興趣,及後遠赴美國升讀波士頓伯克利音樂學院(Berklee College of Music),主修當代音樂創作及電子音樂的製作和設計,名正言順咁繼續寫歌。曾為姜濤打造歌曲《Master Class》、《鏡中鏡》及MIRROR十二子的歌曲《12》。
至於感情方面,Gareth.T與唱作歌手Moon Tang(鄧凱文)一早已經互相follow社交網站,而Gareth.T亦稱讚佢嘅作品不俗,仲邀請佢一齊合作,令兩個個性截然不同嘅人走埋一齊。二人拍拖後愛得高調,不時喺社交網站放閃,成為本地樂壇新一代嘅金童玉女。