阿正咖啡店被顧客投訴 親自回覆兼道歉：我會睇返CCTV

商台DJ黃正宜（阿正）近年人氣急升，瓣數多多，除了電台的工作，更轉戰到幕前，最近她忙於籌備11月假麥花臣的3埸首個個人Talk 騷《正DIVA》，但即使工作排山倒海，阿正亦未有忽略開業逾一年的咖啡店。有網民在社交平台發文，分享位於在西營盤咖啡店不快經歷，阿正亦親自回應。 

該網民投訴阿正咖啡店的muffin 難食，又指店員介紹咖啡時不專業：「收銀嗰個男嘅，問多句都唔耐煩答咁，叫佢介紹手沖同手沖包，問一句答一句，完全無心服務！ 叫杯手沖，吖佢準備乾粉聞香，竟然沖前拎個mug來比我聞一下，唔係上咖啡時另外比少少乾粉，點比較味道呢？ $70杯手沖，唔係嗰1g半g粉都慳呀？ 問手沖包，又唔願介紹，X晒面咁！」

網民同時亦鬧爆另一女侍應的服務態度：「紋身嗰個女侍應，間舖勁熱，叫佢開大啲冷氣，佢強擠一個假笑，竟然話冷氣已最凍！再問佢可唔可以將個葉吹落嚟，佢話驚吹親其他客！頂吖！隔離嗰幾個直情攞張紙喺度撥扇！到大家出聲話熱，先有另一個員工出嚟較冷氣葉！幾個staff都唔X想做咁，剩係大大聲傾計！其實係撐阿正先去，但服務咁都係唔會再去！附近咁多cafe，無謂比錢受氣！有名氣但趕客，可惜！」對此，作為老闆的阿正亦有出面處理，並親自回覆該網民的投訴，她謂：「放心，我睇到。多謝你意見先。口味或者步驟上，你唔鍾意我哋呢間冇問題，最緊要你搵到間你啱飲嘅。口味呢啲嘢好個人。飲啡最緊要開心。」她續表示：「至於服務態度方面，我哋內部已經處理緊，我自己都會睇返cctv。聽完你點講我都要同員工了解吓先嘅，唔會只聽一面。若然真係做得唔好，我哋會同員工再培訓。有其他問題歡迎你email我哋，放心，員工唔會截我email，我全部都睇到。你有唔愉快嘅經歷，我喺度講聲唔好意思。以後會多加注意。」