陳慧嫻加盟英皇首推新歌 《給親愛的親愛》。
陳慧嫻（Priscilla）今日（27日）推出新歌《給親愛的親愛》，歌曲靈感及主題均來自慧嫻，「呢首係我加盟新公司英皇娛樂嘅第一首歌，再加上我好耐都冇出新歌，所以想藉住呢一首歌同親愛嘅觀眾、親愛嘅粉絲講聲Hello。簡單嘅一句『親愛的你好嗎』嘅問候，承載住我對你哋嘅思念同埋祝福，希望你哋能夠感受到呢一份真摯嘅情感，無論大家身處邊一度，都有我嘅音樂陪伴住你哋。」
慧嫻表示選擇這個題材，是因為近年經歷很多聚散離別，無論是移民、工作、家庭又或是成長的原因，曾經關係緊密的好友變得疏離，「其實好多時候都會耐唔耐諗起大家，但硬係抽唔到個時間去見面，我希望可以喺呢一首歌裏面表達到呢種思念同埋祝福。」而最觸動她的歌詞「人生如風似煙 領悟人生後 初見面」，慧嫻解說：「我哋都後生過，個時可能會比較自我中心、驕傲、自私少少，唔識得易地而處，但當經歷多咗、大個咗，我哋睇番轉頭，就會覺得後生嘅時候原來係咁幼稚。大家再見返嘅時候，都發覺大家都變好咗。同埋我覺得呢一句歌詞亦都係令到人好感受到人生嘅變幻無常，當我哋真正理解人生嘅本質之後，或者我哋能夠更加珍惜咁去看待生命中每一次嘅相遇同埋離別。」
陳慧嫻自爆用廁所入面一塊「Yes No」板作錄音決策。
問到錄音趣事，慧嫻笑言舒文為十分正經，跟他一起沒甚麼趣事，但對他錄音室的廁所十分感興趣，更謂好好玩，「佢個洗手間入面有一塊叫做『Yes No』嘅決策板，每一次去洗手間我都會忍唔住攞嚟玩吓。好多時錄到咁上下去廁所，我咪信吖嘛，我就會問吓塊板究竟我頭先嗰個Take得唔得？如果最後粒珠仔走落去YES嗰度，我就覺得一定得！出到去就算舒文叫我再錄，我都唔會再錄㗎啦，哈哈；但係如果粒珠去到No，咁就算舒文覺得係OK我都會話：『俾多次機會我啦……』我會喺度磨爛蓆，哈哈；如果粒珠去到中間，咁冇得揀，出到去等舒文決定使唔使再嚟過。」除此之外，慧嫻透露正積極籌備明年演唱會，「我正在全力籌備我嘅40周年紅館演唱會！期待同大家可以一齊再分享我嘅音樂，好似我嘅新歌裏面有一句歌詞『努力排練 若然一日能遇見』，我哋好快會見㗎啦！哈哈。」
陳慧嫻在新歌領悟到要更珍惜看待生命中每一次的相遇和離別。
