2019-01-14 18:32:00

【呂奇2.0】BabyJohn拍《荷里活有個大老千》搞到底褲都濕埋

《荷里活有個大老千》緊接《大帥哥》播出，收視能否承接著前者，甚或乎能引起大家話題，就要留名待看。有份參與拍攝的BabyJohn蔡瀚億在劇中扮演「舒奇」一角，角色參照當年的呂奇。N年前，羅嘉良在《難兄難弟》扮演呂奇1.0的奇哥深入民心，BabyJohn說今次除了參考六十年代的懷舊片外，亦有參考羅嘉良神作《難兄難弟》。

BabyJohn說︰「呢部戲有好多搞笑位好攞膽，頭段有好多生活上嘅搞笑情節，去到中段就多淒涼位，基本上愈拍愈慘，所以中段我每次去到片場，情緒都好波動大上大落。我個角色係鍾意賭，但冇因為呢次拍戲而去學，因為角色有名你叫─『舒奇』，唔輸就奇，學咗有機會贏，唔學就一定輸，keep 住輸就得啦。」

不要以為60年代背景的劇集會拍得特別輕鬆，BabyJohn稱拍攝時正值盛夏，日日鹹魚生曬，由底濕上面變乾再濕再乾，又鹹又臭又黐立立，真係好難頂，「我哋喺一個 38 至 40 度底下嘅鐵皮廠拍攝，太陽曬落鐵皮嘅熱力直接射入室內，每次我一落車一入片場化妝間嗰吓已經熱到底褲都濕埋；我有個造型係穿三件頭，有次去室外拍嘢，真係好熱，工作人員見我唔郁以為我中暑。」