![《殭屍100~在成為殭屍前要做的100件事~》兼具「喪屍題材」同「日漫真人版」兩大賣點。](https://cdn.am730.com.hk/s3fs-public/styles/article_image/public/2023-07/a1f27a21-1968-11ee-ac5d-5ecd1bbe9bec.png?itok=CfnHsbEC)
《殭屍100~在成為殭屍前要做的100件事~》兼具「喪屍題材」同「日漫真人版」兩大賣點。
「喪屍題材」同「日漫真人版」呢2個元素都有個共通點︰玩爛咗。將呢兩樣嘢放埋一齊而又吸引嘅,中間一定加咗調味料。
《殭屍100~在成為殭屍前要做的100件事~》就係你同我都有同感嘅社畜狂想!
星期一早上嘅你同我
由《今際之國闖關者》麻生羽呂原作、高田康太郎作畫嘅漫畫《殭屍 100~在成為殭屍前要做的 100 件事~》,舊年已經落實改編成真人電影,而Netflix 亦宣布《殭屍 100》將於8月全球上架,並已經推出預告片。以往喪屍片都係離唔開主人公點樣保住條命,中間一定要同大批喪屍激戰,普遍都係驚慄片。但《殭屍 100》就搵到一個無咩人諗到嘅角度。
![yeah!!!!!唔駛返工!!!!!](https://cdn.am730.com.hk/s3fs-public/styles/article_image/public/2023-07/f899a9d2-1967-11ee-b7ff-0aa02131c6fd.png?itok=hQFSi34H)
yeah!!!!!唔駛返工!!!!!
喪屍當道?個個都變晒喪屍,咪即係唔駛返工囉!故事男主角天道輝係一隻社畜,同你同我一樣返工返到想死。有一日,全條街都係喪屍,阿輝發現可以唔使返工,但亦都深知有一日會變成喪屍,於是寫低「成為喪屍前想做嘅 100 件事」,例如執好間房、日頭飲啤酒之類未做過嘅事,並且一邊保命一邊完成呢個bucket list,相信套戲crazy得來會幾感動。
《殭屍 100》嘅男主角會由《如果30歲還是處男,似乎就能成為魔法師》嘅赤楚衛二演出,女主角就會係前乃木坂46成員白石麻衣。而《殭屍 100》亦會推出電視動畫,仲要係喺下個禮拜首播,成個勢配合得好好。不過最好都係……人人變晒喪屍唔駛返工囉。
原文刊登於 電影LOL