![RubberBand世界巡唱歐洲站已圓滿結束。](https://cdn.am730.com.hk/s3fs-public/styles/article_image/public/2023-04/_M2_7959.jpg?itok=D1bfFDU8)
RubberBand世界巡唱歐洲站已圓滿結束。
RubberBand的世界巡唱《RubberBand Ciao World Tour 2023》歐洲站,由英國曼徹斯特、德國柏林唱到荷蘭阿姆斯特丹,已於4月2 日圓滿結束。上周二(3月28日)的德國柏林站巡唱,隨著主音6號的一句:「Hello Berlin!」於Huxley's Neue Welt開始,並以一曲《前面尚有一萬里》掀序幕。首次來到柏林開騷,6號特意學了一句德文來介紹自己:「Wir sind Rubber Band aus Hong Kong!(我哋係嚟自香港嘅RubberBand!)」他表示單是這一句足足練習了兩晚,台下即有觀眾回應道:「夠做喇!」很有香港人的味道。
憶爛聲錄唱《發現號》
6號演唱《細街盃》時,引用歌曲內的歌詞:「『願望每個鄉里 今天覺得完美』呢啲係我哋送畀你哋、帶嚟柏林唱畀你哋嘅歌。呢句原來嚟柏林唱又係另一個意思,見到你哋開心跳舞,一齊舉手 follow the music,我已經係好開心,我哋RubberBand好感動,多謝你哋!」6號在曼徹斯特站唱《假使世界原來不像你預期》時,淚腺失控,如今來到德國站,他自言要好好記住每一張的臉孔,珍惜場內的每一位:「希望我哋可以喺不久嘅將來,就算你哋返嚟香港又好,或者我哋再次嚟到呢度,有好多種種原因有好多人未必可以返到香港,我哋再次嚟到呢度唱歌畀你哋聽,希望都可以再次見到你哋,希望可以喺呢度唱每一首我哋鍾意嘅歌。」台下觀眾亦大叫「多謝RubberBand」作回應。
其後,當RB唱《發現號》後,全場觀眾自發地大合唱,令向來眼淺的6號又差點失守落淚,他說:「喺柏林呢個咁正嘅名城,承載住歷史,嘩死喇,會喊㗎喎⋯⋯」調整好情緒後,他自爆起初不太喜歡這歌,因為在唱片公司逼迫下創作和寫下歌詞,「去咗遠行,返到嚟聲爛晒都要即刻錄音,我係經過好多年月、經過好多次音樂會,台下觀眾同我哋一齊唱呢首歌,我就慢慢同首歌同行、成長。頭先大家一齊唱呢首歌,我係好衷心多謝你哋。」演唱會在兩度Encore後結束
送荷蘭獨有版《睜開眼》
RB抵著5度低溫向德國觀眾唱《小涼伴》, 6號笑謂:「有史以嚟喺最凍嘅地方唱呢首歌,搞唔掂呀,阿叔搞唔掂,好凍呀!」原來他在連日來舟車勞頓下,真的捱病了,以致在荷蘭阿姆斯特丹舉行的歐洲站最後一場演唱會(4月2日),聲線未能發揮出最佳水準,他在演唱《睜開眼》一曲前,刻意將燈光調暗的舞台上表示:「我哋每次唱呢首歌都有個傳統,就係將燈光調暗。我哋一齊感受黑暗、感受難捱、感受無助,但我覺得唔需要驚,即使呢一刻我唱到把聲咁,但都有你哋同我哋一齊唱,所以跟住呢首歌,更加需要大家一齊唱。」他6號笑言是荷蘭獨有的版本。
過去的幾年,香港人因為同伴離開,已說了不少次再見,而大家因去到新天地,而練習了不少次Hello。6號說笑指特地為荷蘭的觀眾帶來香港手信,「其實啲手信係菠蘿包嚟,一陣掉出去畀你哋。」豈料觀眾既然叫好,還指很想念菠蘿包的味道,6號聞言表示:「修正返,係音樂菠蘿包或者音樂牛腩河。」原本touching的場面,卻因為6號的爛gag而令觀眾爆笑。
來到歐洲站的最後一場,6號唱《假使世界原來不像你預期》再次淚崩,他哽咽感謝每位等待RubberBand來到荷蘭的朋友,特意唱出德國站沒有唱的《今天應該很高興》,在Jason Kui《友情歲月》的結化伴奏下,他再次感激一直與RubberBand同行的雷柏熹、Jason Kui及Angelita Li等。當唱畢encore的最後一首歌曲《Ciao》後,台下觀眾仍不肯離去,更是全場一同唱着:「說了再見 約定再見 就會再見」令RubberBand再次回到舞台,6號首次唱出《你會有一天學會面對》和《你和我》為世界巡唱歐洲站劃上圓滿句號。