Sammi紅館演唱會第三場，請來張敬軒擔任嘉賓。
鄭秀文(Sammi)昨晚(14日)於紅館舉行第3場《You & Mi 鄭秀文世界巡迴演唱會香港站》，請來張敬軒擔任表演嘉賓，並換上新裝皮革晚裝配金屬頸飾，迎接「軒公」駕到，她介紹嘉賓出場時笑言：「我叫佢『阿仔』，但依家啲人叫佢『阿公』。」當軒仔從升降台出場時，即單膝下跪，兩人合唱《笑忘書》後，軒仔有風度地輕吻Sammi手背，並細訴當年情。
讀書已睇《大頭綠衣鬥殭屍》
Sammi對軒仔說：「好多年前你做過我演唱會嘉賓。(係呀！)咁你嗰陣時叫做軒仔……(依家都係㗎！)依家就叫做軒公，即係升咗呢，仲要係幾何級咁升添！」軒仔回應說：「我唔知呢個名係邊度嚟？起碼要去到阿公嘅年紀先啦！」Sammi揚言之前兩場嘉賓(Serrini和林家謙)都是新生代歌手，軒仔即細細聲說：「其實我讀緊書嗰陣都有睇《大頭綠衣鬥殭屍》……依家我開騷，有時啲後輩嚟到，例如噚晚嗰個後輩歌手(林家謙)，佢話9歲聽我首《酷愛》！今晚輪到我，山水有相逢。」全場爆笑。
感激初出道獲Sammi提攜
軒仔認真表示，「我要好多謝Sammi，佢係我恩人。其實唔多歌手會帶我呢啲新人出埠表演，但我好開心，當年我仲係新人嘅時候，Sammi帶我去到馬來西亞做佢演唱會嘅表演嘉賓，我好多謝佢！」Sammi說：「其實一代一代咁樣帶出嚟，你依家都係大人，要帶新人出嚟！」然後軒仔唱《隱形遊樂場》，觀眾聽出耳油。
青春奉獻事業感值得
昨晚Sammi特別感性，在演唱電影主題曲環節時，唱出過去十次提名金像獎最佳女主角獎項的電影歌曲時，看見電影片段和全場觀眾大合唱，感觸落淚，「好多謝你哋替我高興，唔知係咪人老咗就容易感觸，頭先睇返一啲自己電影嘅歷程，嘩，原來我嘅青春、我嘅少艾、我畢生嘅努力都放咗喺工作裏面，一眨眼就已經過咗三十幾年。我今日開演唱會，見到依然有咁多人支持，一直陪伴我成長嘅你哋，我覺得好感觸和感動，令我覺得將我青春奉獻晒喺工作上面係好值得。好多謝由我蛋白質少女，嚟到今天已經係中年婦人，你哋都仲咁支持我。」接著Sammi唱《萬物有時》時，更是眼淚決堤，幾乎唱不下去，全場歌迷掌聲和歡呼聲打氣。昨晚有《九龍城寨之圍城》監製莊澄、邱禮濤導演、歌手鄭融、周勵淇、胡蓓蔚、胡定欣、黃智雯和DJ主持朱薰等捧場。
amJetso送大灣區航空首爾及台北機票 👇🏻👇🏻 立即參加👇🏻👇🏻
