齊齊綠色Dress Code嘅議員陳月明(左一)、葛珮帆(中)、林琳(右二)同陳凱欣(右一)，喺會議廳拉埋局長麥美娟(左二)合照。(李睿哲攝)
新一份《施政報告》繼續以綠色做封面，特首李家超同團隊噚日公布《施政報告》時，都紛紛打條綠色呔或戴綠色領巾。嚟到第二日，各問責官員開記者會講解政策時，都繼續噚日嘅Dress Code，發展局常任秘書長(工務)劉俊傑雖然唔係問責團隊，但都有打同特首、局長一樣嘅領呔，房屋局常秘羅淑佩亦有着返件綠色褸。
綠褸女議員齊齊合照
至於喺議事堂，今日(26號)就繼續有議員配合Dress Code，Ray仲見到着綠色褸嘅選委界簡慧敏、陳月明、陳凱欣、民建聯葛珮帆同林琳，拉埋綠褸綠領巾嘅民政及青年事務局局長麥美娟齊齊影相，見到大家都笑得好開心！男議員方面，民建聯顏汶羽、經民聯盧偉國同教育界朱國強等，都有打返條綠色呔。
勞福局政助生日撞正施政報告
另外，噚日原來仲係勞工及福利局政治助理傅曉琳嘅「牛一」！着住深綠色外套嘅佢，當然就要喺工作中渡過喇，不過就有局長孫玉菡同副局長何啟明同佢切蛋糕慶祝生日，補返晒啦！
