Coldplay演唱會喺啟德體育園上演，政界人士都係座上客。實政圓桌立法會議員田北辰去咗睇頭場，之不過佢同日發現雙眼白內障復發，即時趕做激光手術，順利喺夜晚欣賞到演唱會。
一年半前，田北辰雙眼做咗白內障手術，但近日發覺視力愈嚟愈差。噚日卒之搵立法會同事兼眼科權威林順潮醫生檢查，原來雙眼白內障復發，即時進行激光手術。完成手術之後，田北辰睇嘢唔係好清楚，莫講話要睇字。但係佢下晝又要趕返立法會開會，佢話好彩記性仲幾好，記得晒自己喺講稿寫過嘅嘢，喺會上可以順利向官員提問。
田北辰指「要寫個服字」
完成公務之後，田北辰約咗屋企人睇Coldplay首場演唱會。就算視力麻麻，佢話現場嘅音響同氣氛都非常震撼！佢聽講除咗Taylor Swift，全世界演唱會收入最勁嘅就係Coldplay呢隊國際殿堂級組合。親身感受過後，佢大讚Coldplay果然名不虛傳，「真係連我阿田都要寫個服字！」佢希望未來香港可以有更加多同類型嘅盛事表演。
立即更新/下載AM730手機APP 體驗升級功能
