慈善從來講心，除了實質金錢行善，用心感受社會需要更難能可貴。剛卸任保良局主席的陳細潔(Abbie)接受本報專訪，回顧她由總理做起、服務11年的保良局工作。她稱對保良局充滿不捨，又用前線服務經驗分享，稱感受到家庭代溝愈趨嚴重，呼籲兩代人加強溝通。文：葉兆臻 攝：鍾式明
與學生合演話劇，陳細潔稱消除代溝貴在溝通。(受訪者提供)
十年樹木，投身保良局慈善工作超過10年，原來緣於「幫家姐」，「11年前家姐(陳小寶)做主席，叫我入保良局幫手，嗰陣只係諗住做一年算㗎啦……結果由總理做到主席，一做11年，保良局係一個好好嘅慈善平台，由一個人出世，到入土為安都照顧得到。」機構工作涵蓋幼兒、教育、醫療和安老，「做過好多唔同服務，包括長者，因為自己自小由祖母照顧，識得同老人家溝通；亦特別重視年輕人工作，喺保良局接觸好多年輕人同家長之後，有好深體會，家庭嘅代溝愈嚟愈大。」
陳細潔去年接任主席時，亦強調要加強青年工作，一年間，她多次帶領機構屬下學校學生考察團，出訪內地和海外，又與年輕人一同排舞、演出話劇。她坦言感受到年輕人怨氣大，「好多時由家庭而起，家長可能因為成長背景辛苦，唔想仔女同樣困苦成長，於是過度保護、提供最好嘅生活條件，結果仔女成長期冇機會發揮。但到仔女畢業投身社會，家長又覺得仔女唔夠積極主動，跟住就催逼佢哋，代溝、矛盾就係咁嚟。」她認為解決方法在於教育方法和溝通，「成長過程好關鍵，父母要俾機會子女發揮，同佢哋講嘢唔可以淨係講以前點；香港嘅年輕人亦唔好墨守成規，多啲行出去，睇吓個世界。」
日瞓4個鐘 難忘搵友勸捐
卸任主席後，她將繼續擔任保良局顧問，暫別前線工作，陳細潔稱：「都好唔捨得，但做咗11年都好足夠。尤其做主席呢一年，長期每晚瞓3、4個鐘；高峰期每日5、6項工作，做到好似機械人，好似做咗成世人嘅嘢咁。」卸任翌日她一睡便11個小時。回憶起工作最難忘的事，很難想像縱橫商界多年的她稱：「起初最驚同人傾偈，啱啱入保良局嗰陣，成日俾家姐話我，『唔好似嚿飯咁坐喺度啦！』但我嗰陣真係唔知同人第一次見面講乜好，好似而家嘅年輕人，家長叫佢主動行出去，講就易，實情要點做先得㗎……最後唯有不斷提醒自己，主動啲講嘢。」
在擔任主席一年裡，最困難是籌款，「好多人以為保良局大把錢，實情係每年開支好多，屬下咁多機構同服務，每年要使成30億元，扣除政府資助都要自己籌大約10億元，而且好多善款指定用途，唔可以隨意動用。所以成日會搵朋友捐錢，同自己上門遊說。」
陳細潔曾帶領保良局屬下中學學生到北京考察。(受訪者提供)
【限時激減】800 amFUN 2盒！1200 amFUN 4盒！
