平日講起「車中泊」(Car Camping)，不少人會聯想起汽車露營體驗，但在本港第五波疫情期間，不少染疫市民因為社區隔離設施爆滿，加上家居環境不容許等因素，無法安排居家隔離，衍生出「車中泊」這種另類隔離方式。一名確診的運輸業界司機，便因家中有初生BB，只好在七人車上自我隔離6日，期間不但在獲取食物和藥物方面有困難，就連大小二便和梳洗亦都成為一大難題。
記者：劉凱欣 攝影：蘇文傑、夏家朗
羅先生無奈透過「車中泊」這種另類隔離方式，保障家中初生嬰兒及同住家人。(蘇文傑攝)
從事運輸工作多年的羅先生，不但是一家經濟支柱，亦是一名新手爸爸。為家人著想，他早在三月初已完成接種兩劑「復必泰」疫苗，惟不久後感到身體不適，於是自行做了多次快速測試。雖然快速測試結果都呈陰性，但羅先生不敢掉以輕心，遂向太太提出「車中泊」的想法，「屋企有個只係出生咗一個月嘅BB，同太太商量過後，穩陣起見，我都係執包袱瞓私家車，做好自我隔離先。」
首兩日快測陰性第三日陽性
首兩天，羅先生的快速檢測結果都呈陰性，豈料第三天突然發燒，快速檢測結果顯示兩條紅線，即代表他已經確診新冠肺炎。確診後，他曾致電衞生署熱線，申報其陽性檢測結果，希望可以入住社區隔離設施，但署方卻一直遲遲沒有任何安排。
對於育有初生嬰兒的羅先生，居家隔離明顯不是一個萬全的選擇。羅先生無奈說：「你問我咁做係咪一定啱？我答你唔到。我只可以話我無得揀！你諗下香港啲屋，到底有幾大？如果我居家隔離，屋企個BB咁細，無打過針又無抵抗力，點會唔擔心傳染到佢。做得爸爸，就有責任要保護小朋友，迫於無奈只可以瞓車。
批政府零支援如「等死」
解決了隔離地點的問題，生活物資又成為羅先生的另一煩惱。他再向衛生署查詢，是否可以提供檢測包、藥物及食物等支援，接線生指由於他不屬強制檢測個案，只能向社工求助，但由於前線人手緊張，物資需時6至7日才能可送達。羅先生憶述：「嗰陣盛傳封城，想搵粒藥都難，政府完全零支援，好似等死咁。6至7日乜都病好啦，好彩最後有朋友同屋企人幫手，先可以渡過。」他以藥物及食物為例，稱只能靠親友放於車外，待確定四周無人，戴好兩個口罩後，他才急步下車拿取。
染疫期間，羅先生的生活空間，局限在小小的七人車的後座範圍。睡覺時，他會將私家車的座椅拉下平放，變成一張單人床，並在車頭加上遮光板。至於日常大小二便，羅先生稱盡量留在車上小解；大解則在忍無可忍下，才會駕車到偏僻的公廁解決，以減低感染其他人的風險。
凌晨到確診朋友家沖涼
「我喺車上足足4日無沖過涼，直到有朋友全家染疫，聽到我慘況，叫我上去佢度沖涼梳洗，話大家都中咗，唔介意。」羅先生最終選擇在凌晨時分，即遇到陌生人最少的時間，在做足防護措施下，才敢到友人家中梳洗。
禍不單行的是，即使羅先生已提前自我隔離，盡力保護家中初生嬰兒免染疫，但在第4天仍接到太太告知的壞消息—— BB開始發燒。羅先生說：「身為新手爸爸的我，當然好焦急好徬徨。自己無辦法做到啲咩，唯有靠太太同屋企兄弟幫忙。本身去咗私家醫院，但嗰邊唔收，最後去沙田威爾斯親王醫院求診，等咗6、7個鐘，醫生終於話BB可以入院接受治療。其實知道醫護人手都好緊張，真係好忙好辛苦，雖然等咗咁耐，但真係都好感激佢哋。」
初生BB染Omicron太太崩潰
BB住院數天後證實染上變種病毒Omicron。羅先生形容：「當下最難受同崩潰嘅莫過於太太，屋企一大一小都中咗Omicron，令佢好擔心，精神壓力十分大。最深刻佢喺電話喊住問我，可唔可以返屋企陪佢，佢話情願自己中埋Omicron，都唔想得自己一個面對。」羅先生忍痛回絕太太的要求，「我中咗Omicron係輕症，唔代表太太中咗都會同我一樣無乜事。如果佢中咗變重症，咁樣點算？」
更大的難關是，羅先生從事運輸工作，屬自僱性質，在染疫期間難以工作，只能被迫手停口停，「我返一日工先有一日錢，成個3月到依家，我只開咗三日工，要養車、有家庭開支、仲要額外購買防疫物資，生活有幾困難可能而知。正常一般市民係要工作同生活架，唔係似政府高官咁離地，抗疫政策朝令夕改，影響好多人生計。」
羅先生續稱，在第五波疫情之中，感覺政府發放的指引及資訊十分混亂，應變未如理想，令市民徬徨無助，只能自救。「你以為我係最慘嗰個咩？同你講一定唔係。喺停車場我都見到有唔少類似我嘅情況，同病相憐你眼望我眼『車中泊』。政府到底做咗啲乜？點解市民會淒涼到咁？我諗要問返政府先知。」
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
