黃偉綸(右二)早排同史立德(左二)、施榮恒(右一)一齊去美食嘉年華。(黃偉綸FB)
政府早前推出「香港夜繽紛」活動，一連9日喺葵涌運動場舉行嘅「第10屆香港美食嘉年華」將於今晚結束，財政司副司長黃偉綸感謝廠商會響應「夜繽紛」，話延長開放時間令市民放工後可以鬆一鬆，佢仲呼籲市民唔好錯過下個月喺維園舉行嘅工展會。
大讚燒賣配手打檸檬茶
黃偉綸日前就同廠商會會長史立德、副會長施榮恒，一齊去葵涌美食嘉年華湊熱鬧，仲提到部分市民入場之後可以免費獲贈雪糕，佢都去湊下熱鬧試食。黃偉綸又話，今次係疫情後首次復辦美食區，喺場內見到唔少市民去「掃街」醫肚，佢哋3位就即場試咗燒賣配手打檸檬茶，形容相當出色！
萬聖節前夕參與德國啤酒節
除此之外，黃偉綸喺萬聖節前夕當晚(10月31號)亦去咗中環街市，參與中環街市特別響應「夜繽紛」活動而舉辦嘅「德國啤酒節」，感受一下節日氣氛，仲特別幫襯小商戶，買咗啲零食同同事分享。佢提到好欣賞活化後嘅中環街市令人耳目一新，除咗有唔同餐廳、酒吧同小店，亦加入咗藝術文化元素。
amJetso送太興鮮臘腸 👇立即按此參加
