[專訪]上演5個月的「土地大辯論」今日結束，民間視這場「大龍鳳」是為政府鳴鑼開道，掃除壓力團體反對填海的障礙。本身是地產商的自由黨榮譽主席田北俊，雖然同意填海造地選項，但他一眼看穿「大辯論」是假諮詢製造民意，並質疑特首林鄭月娥是否有政治決心及政治能量解決房屋問題。他指特區政府坐擁逾4萬億元儲備，「政府最大能力係大把錢」，大可利用這強項以市價收購私人擁有的土地建屋，認為林鄭月娥毋須畏首畏尾害怕「俾人鬧」。記者：鄭秀韻、香詠倫 攝影：林俊源
林鄭月娥早前指「無麵粉就造唔到麵包」，田北俊日前接受本報訪問，亦同意缺乏「麵粉」，「但你話搵唔到(麵粉)，當然個個有唔同睇法。」他認為，土地供應專責小組提出的18個選項中，最容易處理是棕地，但現時新界棕地分布分散，難綜合成為完整地皮建屋，「我覺得攞現有棕地，再加埋私人地產商擁有嘅地，同埋政府原有嘅地，係咪用呢個所謂公私營合作，先可以砌到一塊好大嘅地嚟『兩贏方案』？」
公私營合作 免十足補地價
要達致雙贏，他認為需向地產商提供誘因，做法是毋須按十足市值補地價，「補地價要成事，要低過市價一啲，聽落去好似輸送利益俾地產商，但如果冇誘因俾地產商，就好似以往咁多年，傾嚟傾去都傾唔成。」田北俊申明自己並無擁有農地，因此絕非為自己講說話，「從地產商角度，佢哋大部分上市公司，如果冇著數就冇人做，依家係兩輸……」提起公私營合作，自然會引起「官商勾結」的負評，田北俊說，「呢個正係政府夠唔夠強勢」。他說，「如果係強勢政府，俾佢(地產商)補(地價)平啲，因佢可能要起埋條路，但可以釋放到咁多房屋出嚟，到時起到樓嘅話，樓價係供求問題。」因此他認為，「市民唔好咁避忌，『(一聽到)公私營合作一定輸送利益，一定係益地產商』。」
倡輸入外勞只限建公屋
他亦同意填海及發展郊野公園邊陲地帶兩個選項，並認為必須輸入外勞，「你有麵粉，冇麵包師傅，市民一樣冇麵包食。」他不認為提出輸入外勞會被群起攻之，強調輸入外勞僅限於興建公營房屋，一如當年為新機場實施的特別輸入勞工計劃，「入口外勞起公屋，有邊個鬧先？」
至於坊間鬧得熱烘烘的粉嶺高爾夫球場去留問題，田北俊認為，粉嶺高球場不適合用作建屋。他再次申報利益，表明不打高球亦非高球會會員，「從香港整體國際大都會、國際形象，(如果)一個似樣嘅高爾夫球場都冇，都要剁埋一塊出嚟，我覺得唔需要咁做，兼且嗰度可以釋放出嚟嘅地唔係多，講緊幾十公頃(而已)。」
土地大辯論 假諮詢製造民意
林鄭月娥早前已表態支持填海，被外界質疑政府有預設立場。田北俊不諱言，「我都好同意呢個講法，我覺得直情係大龍鳳。」他並說，「呢個假諮詢製造民意，就係佢(政府)根本覺得民意都會同意佢講法……你俾人揀十幾樣，最揀得落手，就係政府想要嗰三樣，即係棕地、局部地方填海、現有(郊野公園)建設旁𠴱啲樹斬咗起樓，其他(選項)天馬行空，冇人支持。」
有評論認為香港不是無地，而是欠缺規劃，亦無善用得天獨厚的龐大儲備，田北俊同意此說，「佢(政府)使錢又驚俾人話輸送利益……係咪因為政府唔夠強勢，又驚做咗俾人鬧？」對於林鄭月娥有否政治決心及政治能量解決房屋問題，田北俊說，「我覺得林鄭好想做，但好想做，決心係咪百分百？我又覺得唔係；佢嘅能量有冇百分百？可能佢唔係普選產生，我又覺得佢唔係，如果佢有咁嘅能量、有咁嘅決心，咪俾市價高啲，乜地都收晒去囉，地產商啲地收埋去，農地又可以收埋，棕地政府出嚟『立』晒去，你咪自己去起囉，政府橫掂大把錢……」
儲備豐厚 毋須畏首畏尾
歸根究底是林鄭月娥畏首畏尾？田北俊直言，「佢都難做嘅，佢唯一畏首畏尾得嚟，我覺得唔使擔心嘅，就係我哋嘅儲備真係好豐富(厚)。」他指出，相對於全球很多政府因破產而舉步難行，「香港政府攞住四萬幾億，係我哋強項，但佢話要攞嚟捍衛港元，係咪要四萬幾億呀？仲要話有十幾萬公務員長俸，嗰度幾千億，全世界有邊個政府儲備要攞所有公務員長俸計晒落去？」
他認為，政府最大能力是「大把錢」，「特首應該計計條數，四萬幾億(儲備)，政府一年使五千億，全世界冇一個政府嘅錢，係可以一毫子冇得入，都夠使未來十年，你要咁多錢嚟做乜呢？你係孤寒財主呀？」歷屆特首都指土地房屋問題是施政重中之重，「如果十年後仲講緊房屋問題，相信林鄭唔想見到係咁。」他補充，「佢嘅決心同能量做唔做到呢，都係有個問號，夠膽你咪去做囉，你依家咁，呢到又驚呢樣見嗰樣，搞到尾得個講字。」
【限時激減】800 amFUN 2盒！1200 amFUN 4盒！
