特首參選人林鄭月娥將於今午舉行分享大會為選舉造勢，昔日被外界視為林太「愛將」的發展局前局長麥齊光，此時卻突然公開表態支持她的對手曾俊華。麥齊光接受本報訪問時說，因早已應承曾俊華，並贊同其促進社會和諧的參選理念。他並道出與曾俊華患難見真情的友誼，指當年自己捲入涉嫌詐騙租金津貼案，一直得到曾俊華的關心，時任財政司長的曾俊華，更是唯一在職官員為他向法庭撰寫求情信，這段雪中送炭的經歷是否要「報恩」，麥齊光說：「唔係，義氣仔女啱啲。」
記者：鄭秀韻 攝影：蘇文傑
1976年加入政府的麥齊光，昔日在官場被指獲林鄭月娥賞識，07年位至發展局常任秘書長，與時任發展局長的林太合作無間，他於2010年6月退休後，出任發展局支援四川重建小組組長，兩年後有傳他獲林太力保下出任發展局長，但在「兩司」對決的特首選戰，他公開表態支持曾俊華，令外界不無驚訝。
贊成促社會和諧理念
麥齊光日前接受本報訪問，道明支持曾俊華的原因，「佢(曾俊華)講一啲理念令我好贊成」。他說，「阿John(曾俊華洋名)同我講，佢好想令香港社會更加和諧，更加做得唔好有啲非黑即白、好多敵對，我覺得佢係好sincere(真誠)嘅一個人；我可以幫咪幫下手囉，佢話如果咁情況支唔支持，我梗係支持啦。」
他憶述與曾俊華傾談時，「當時潮流係講ABC(Anyone But CY)」，而那時林鄭月娥對外表示會退休，「佢(林太)冇話過選」。他指約於去年10月獲邀與林太吃飯，當時她宴請不同界別，「佢公開(講)又有喇，我得出嘅感覺，可能外間感覺亦係佢會退……」他坦言林太宣布參選前無找過他，「宣布(參選)後，我有同佢(林太)傾過偈，係最近嘅事……」他無透露是否有向林太提及會支持曾俊華，「詳細就唔好講啦……因為我已經應承咗一個，我唔會有改變諗法，同埋講到最重要都係理念問題。」
政圈盛傳部分曾俊華的支持者轉投林太陣營，麥齊光說，「我唔會comment(評論)第啲人諗法，但我自己做咗一樣嘢，亦唔止『既然應承咗』嘅事，我覺得佢(曾俊華)對同事，唔係淨係同事，都擔任一個朋友……」他主動提及當年捲入的租津案，「我有呢個法庭嘅事件後，佢(曾俊華)好關心我，呢個唔單止係一個同事……」
當年這宗「法庭事件」令他深受觸動，他形容，「呢個人生嘅過程裡面，你(我)經歷過呢啲嘢，每件事都會令你(我)觸動，好多人都會觸動……」記者問林太有否令他觸動？麥齊光沉默半晌，「er……阿John有啦！」不光是相識的人，即使是不認識的人，例如在山頂遇到的晨運人士，一句「麥先生，我哋支持你！」的打氣說話，他亦銘記於心，「盡在不言中，你自己感激嘅心，知道嘅！」
曾俊華主動撰求情信
他重提曾俊華當年為他向法庭撰寫求情信的一幕，「阿John同我寫咗封信去法庭，我一個人都冇叫寫信，但佢主動寫，佢係在職嘅官同我寫，冇一個在職嘅官……」曾俊華當時出任財政司長，發展局直屬財政司長，兩人曾經共事，他形容「拍住一齊做」，但他指兩人主要在公事上接觸較多，「唔係認真話close friends，但佢係一個好隨和嘅人，適當嘅時候做適當嘅嘢。」
不評論林鄭月娥
外界對曾俊華及林鄭月娥的觀感，一個被指「無為」，另一個則較「有為」，麥齊光不願比較兩位前上司，「我唔會做一啲比較，呢個亦唔係好公平講法。」他指每人有不同角色及崗位，亦面對不同問題，「唔可以一概而論，呢個問題，唔可以三言兩語咁樣講。」他亦不評論林太，自言實質退休已6年，「你要我講佢呢幾年，我都無從講，亦唔係好fair(公道)。」
麥齊光支持曾俊華參選，並會就基建問題提供意見。對於外界批評曾俊華近十年財政司長生涯「hea做」，甚或無任何功績，麥齊光不以為然，「政府嘅決策唔係一個人嘅事」。在政府服務37年的麥齊光說，「有好多嘢係內部拗過晒，內部拗過咩唔會同人講，有時啲嘢唔係黑白……睇一個人嘅性格係唔係想表露……唔同時間、唔同階段，每人表現唔同，你個個都爭住出來爭風頭嘅，有時啲嘢唔係咁……」他隨意舉例，「例如派錢都好大代價，你估(內部)冇傾過咩……」他補充，「同埋政府內大政策，會去過行政會議傾過晒㗎嘛。」
曾俊華年輕時舉家移民美國，外傳他不獲中央信任，麥齊光反問，「你覺得佢係咪美國人？佢返嚟(回流)三十幾年，我有啲朋友話，『乜你啲人覺得佢係鬼佬咩？』佢啲仔女叫文心、雕龍亦唔嘢小，嗰本書(《文心雕龍》)好難讀㗎！」外界不斷傳出消息指曾俊華多次被勸退，麥齊光說，「呢啲係消息啫，佢同我講時好堅定」，他笑言「可能因佢打劍，打功夫啲人可能沉潛。」
(相關訪問見A2)
立即更新/下載AM730手機APP 體驗升級功能
