張宇人排咗陣長龍，成功買到冬瓜盅二人小菜套餐做晚餐。(張宇人FB)
政府今日(16日)派發第二期消費券，除咗「財爺」財政司司長陳茂波即刻出去食個豐富早餐之外，飲食界立法會議員張宇人亦都出動四圍搵食，至於減肥就留返聽日再做咁喎！
話說飲食界繼7月1號搞咗七一折優惠活動之後，趁今日派第二期消費券就舉辦多一次。身為業界代表嘅張宇人，早餐先去連鎖包餅店用16元買咗個芝士餅同奶茶，之後午餐就同連鎖餐廳集團老闆一齊食，佢哋嗌咗個燒味八寶飯套餐、加埋燒鵝脾、乾炒牛河、紅荳冰、冰鎮奶茶，夾埋都唔使300元！
打風前夕晚餐「手快有、手慢無」
食完早餐午餐嘅張宇人話要休息下先，下午茶就去到一間茶餐廳叫咗個七一折嘅四寶河套餐。日頭食咗咁多晚餐點算？佢話今晚有機會打風，所以買優惠晚飯更加係「手快有、手慢無」，最後去到沙田另一間連鎖快餐店排咗一陣長龍，買咗個冬瓜盅二人小菜套餐，再搭多碟生炒排骨、焗叉燒。
最後張宇人感謝飲食業界不計成本，鼎力支持「七一折優惠」活動，亦都好開心見到市民「食到笑晒口」，希望大家繼續開心食！
