Ray Online｜田北辰慶74歲生日　指今年生日示範「香港人效率」用最少時間做最多事

實政圓桌立法會議員田北辰迎嚟74歲生日，佢話今年生日親身示範「香港人效率」，用最少嘅時間做最多嘅嘢，到底佢有咩生日節目呢？

田北辰喺社交網站分享，上星期五一家人快閃上海玩足2日，今朝一早已經返到香港參加三中全會精神宣講會，之後仲有一班議辦同事幫佢慶生。田北辰話每年生日都係同屋企人一齊過，而最開心就係睇住啲孫仔孫女快高長大，佢就忍唔住諗起佢哋嘅未來，思考點樣建設更好嘅香港，畀佢哋可以世世代代喺度安居樂業。有人話香港失去昔日嘅光芒，但田北辰覺得香港只係面對緊轉型期，反問咁多年嚟有咩風浪未見過，每一次都可以轉危為機，所以佢對香港未來充滿信心。

田北辰希望在大嶼山興建旅遊配套

至於田北辰今年嘅生日願望係乜？佢話講出嚟就好難實現，不過大家睇吓議辦同事為佢悉心準備嘅蛋糕就估到。佢希望10年之後，可以同孫仔孫女去大嶼山度假，喺南大嶼玩滑翔傘、去欣澳鬥賽車，再搭第5條跨海鐵路去洪水橋巨型綜合娛樂城滑雪。佢話呢塊「蛋糕」可以令香港持續保持新鮮感，吸引國內外遊客，成為充滿驚喜嘅動感之都。田北辰希望政府同全香港市民一齊努力做好呢個「Cake」，香港將來唔會「撠」。