Ray Online｜立法會溫馨提示議員 與同僚分享點心需提早1周通知秘書處安排
立法會議員周不時都會準備啲小食，同其他議員分享。不過據了解立法會秘書處透過電郵向議員發出「溫馨提示」，話議員需要提早最少1星期通知秘書處，方便佢哋作出妥善安排。
需提早最少1星期通知秘書處
特別係逢星期三立法會大會，提出議員法案同議員議案嘅議員，好多時都會準備啲簡單小食，同其他議員以至官員分享，開心一下。不過據了解立法會秘書處發出「溫馨提示」，首先話好多謝各位議員喺立法會會議日踴躍準備各式點心、甜品、水果同特色小食分享。但係為咗更有效協調各位議員所準備嘅食物種類同份量，同避免重複或者浪費，議員需要提早至少1星期通知秘書處安排。
