![Ray Online|葉劉推介多間香港餐廳 指要讓人認為值得在港消費](https://cdn.am730.com.hk/s3fs-public/styles/article_image/public/2024-04/434410170_994045155411759_1307661010844298194_n.jpg?itok=Zb83inV4)
Ray Online|葉劉推介多間香港餐廳 指要讓人認為值得在港消費
復活節連假期間,香港出境人次遠超入境人次。行政會議召集人葉劉淑儀就留港消費,話除咗公務之外都留喺屋企好好休息。今朝處理好文書工作之後,就趁住最後一日假期同朋友落區,仲推介多間餐廳喎。
葉劉喺社交網站大方分享行程內容,第一站先去大坑。佢話眾所周知小區入面有好多特色美食,包括經營超過40年嘅康記粥店,有新鮮又好味嘅豬潤腸粉同綿滑嘅皮蛋魚片粥。另外,連續多年榮獲米芝蓮美食推介嘅潮樂園,都係葉劉成日幫襯嘅餐廳,佢嗌咗鵝片、豬頭肉、滷水蛋同豆腐潮州四寶,攞返屋企慢慢食。之後葉劉經過祥勝茶餐廳,見到大排長龍,原來大家都係為招牌蔥油豬扒飯同埋蔥油煎土魷肉餅飯而嚟。區內出名嘅意大利餐館「Nocino」咁啱休息,葉劉同朋友就幫襯蓮花宮附近嘅另一間意大利餐廳「Ask For Alonzo」,佢話食物無論賣相、品質同分量都好唔錯,加上餐廳好有國際化氣氛,每人平均消費只係百幾蚊,佢覺得係物有所值。
葉劉指大坑橫街有不少空舗
行盡大坑唔同角落,葉劉留意到部分舖頭喺長假期嘅生意唔錯,但橫街有唔少吉舗,有街坊見到呢個境況都忍唔住落淚,話香港各行各業經營困難,冇辦法逆轉香港人北上消費嘅趨勢,話明白政府好努力,但都要諗辦法挽救香港經濟。
之後,葉劉同朋友去鴨脷洲買餸,發覺鴨脷洲大街遠比疫情嗰陣淡靜。而佢哋一行人去到鴨脷洲街市嗰陣人流就唔錯,相信因為街市以靚海鮮聞名,葉劉就買咗一隻佛山冰鮮雞同牛肉。
要讓人認為值得在港消費
總結呢一日行程,葉劉話聽到大家訴說苦況都覺得無限唏噓。佢提到香港市道好差,反問就算政府努力舉辦全港18區「日夜都繽紛」活動,但實際帶到幾多經濟效益?葉劉話香港營運成本好高,除非可以創造極大價值或者大幅減價,等大家覺得值得喺香港消費,唔係嘅話短期內好難改變市道低迷嘅現象。