「你束花好大好靚啊！」「你男朋友有無送花俾你啊？」情人節遇上要返工的日子，對很多職場男女來說，意義非凡。在女士心中，有冇情人已是其次，重點要有花送到辦公枱面；另一邊，男士則苦惱女伴嫌束花不夠閃。精彩的還在後頭，冇花收的上司和同事，目睹有人收花、收公仔加氣球，隨時「㷫過火屎」。今天，辦公室是「送花收花真假幸福眼火爆修羅場」。
今天是情人節，一年一度的辦公室收花競賽又開始，很多女士無論自願或不自願，都會投入比賽，爭取「最快收到花獎」、「花束最大獎」以及「呃最多like獎」。收花戰況熾熱，有時甚至意外燒到上司，有網民分享：「之前有個同事情人節收到四、五紮好大嘅花，隔籬組嘅同事都嚟「參觀」起鬨，結果冇花收嘅阿姐，唔知真嬲定酸到躁底，發火鬧佢要佢OT(加班)。」有人對收花被鬧表示同情，亦有網民反對公司放閃，更「爆大鑊」：「好憎啲人放花上公司，都唔係做嘢嘅。有個同事仲乞人憎，每年情人節都會去花舖訂花俾自己。」有人隨即回應：「點解要死撐？冇伴咪冇伴囉！」
收花演變成職場紛爭，循道衛理輔導中心輔導主任方健貞認為，顧及同事感受相當重要，「當然，收到花係開心事，但如果造成同事起鬨、繼而影響工作氣氛，咁就可能破壞到辦公室嘅秩序。一般老闆都會希望員工專注工作，若果有同事只係諗自己，帶來不良後果最終都係要自己承受。」她勸勉員工應以「大局為重」，「情人節起源是人們勇敢追求愛情，花束愈大，唔係代表愛愈濃。表現愛嘅方法有好多種，只以一束花衡量，就真係太簡單、太商品化。」
安俊人力資源顧問董事總經理周綺萍認為，員工收花一般無傷大雅，「但員工收斂啲就好啲，始終職場鋒芒太露唔係好事，避免有同事、上司妒忌……有時送花係咪一定要送上公司？晚飯先送都得㗎，又或者同男朋友提出，一小束就得。」她聽過有人會訂花給自己，「哄自己開心、又避免俾人講都無所謂嘅。但如果係上司，根本唔使同下屬競爭；唔怕俾人講的話，更加毋須做呢個動作。」
最重要學自處之道
有職場女士「訂花俾自己」，方健貞坦言不會鼓勵，「人唔應該以一束花嚟顯示自己嘅價值，亦唔需要一般見識。」不過，她強調「呢個唔係對與錯問題，如果買花俾自己係佢自處嘅方法，令佢覺得喺辦公室舒服啲、維持到自尊、不被同事取笑，咁做都無可厚非，自處方法有好多種，又或者一年後，佢覺得自己唔需要再咁樣做呢。」
立即更新/下載AM730手機APP 體驗升級功能
