社會有世代矛盾，辦公室亦如是，老鬼嫌新人「幼稚、懶散、唔襟捱」；新丁怨老鬼「守舊、擺款、腦閉塞」，雙方互看不順眼，甚至劍拔弩張，代溝變鴻溝。要知道老鬼都曾經做過新丁，新丁亦終有日變老鬼，又何必與昔日或未來的自己爭鬥，老土講句：何不以和為貴。
俗語話「野蠻奶奶都做過新抱」，老鬼新丁同樣處於這種微妙關係，今日的新丁鬧老鬼，可能他日調轉身份就奚落新人。網上論壇不少互數罪狀的帖文，有白領新丁大吐苦水：「返新工預咗俾人鬧，但遇到一個好賤嘅老屎忽，日日小圈子玩針對，明明做啱都要搵嘢嚟踩我，態度衰仲講晒粗口，唔使咁恰法啩。」不少網民表示同情：「同老細講，如果公司唔理就辭職。」有人更建議：「學晒佢啲嘢，捱到做老鬼，第日照辦煮碗整新人。」
另一邊廂，有白領老鬼感歎「一代不如一代」，「啲Fresh Grad可唔可以醒少少，一連嚟幾個都好差，返工遲到唔識嗌早晨、假期前夕例牌請病假，有一個連請假都唔同公司講，就咁消失咗。」有從事零售業的網民稱：「最憎新人淨係識得『走精面』，唔做粗重嘢。」
專家：同坐一條船 唔好只諗自己
世代矛盾似是難解的結，安俊人力資源顧問董事總經理周綺萍表示，新舊爭鬥相當普遍，「除非專請年輕人士嘅公司，例如資訊科技業，否則大部分公司都希望傳承，實有資深同新人。而兩者世代唔同，技能、思考角度、工作態度都唔同，有矛盾都係正常，關鍵係點化解。化解方法最緊要唔好只係諗自己，要將自己放喺對方位置去諗問題，將心比己，多啲溝通同解釋，大家同坐一條船，大家搵個中間點。」她續指，雙方都有責任與對方溝通和合作，「資深員工有一定成熟程度，見過世面，通常比較有能力行多一步；年輕一方當然都要保持良好嘅工作態度，唔好諗住被人照顧。」
化解矛盾 老闆角色關鍵
職場心理學講師周朗認為，作為一間公司的終極決策人，老闆角色最重要，「理想嘅公司一定係資深員工同新人共同協作，老鬼有經驗、諗嘢長遠；新人有時代觸覺，所以老闆應該盡力融合雙方，等全部員工分享工作成就，呢個目標明確就可以減少爭拗機會。最理想做法係事前做好雙方嘅溝通同工作分配，事後有矛盾先調解就已經遲。」萬一出現矛盾，老鬼和新人都應向直屬上司尋求協助，老闆亦應提供支援，「例如老鬼因為教新人而增加工作量，唔好發洩住，同上司講咗先，可唔可以減少平日嘅工作；新人俾人『蝦』，同上司溝通，睇下可以點解決矛盾，唔好訴諸情緒。」
立即更新/下載AM730手機APP 體驗升級功能
