「遞咗信未啊？」農曆新年前後，又到打工仔離職高峰期。員工辭職後，除了交代工作、收拾物品外，還有壓軸一步——派散水餅。箇中學問並不簡單，由5蚊一個蛋撻，到70元一件的千層蛋糕，如何顧及銀包之餘，又不失大方？倘若離職員工是不歡而散，又能否省卻禮數？
離職派餅的傳統不知始自何時，但現已被部分網民列為「last day三部曲」之一，(分別為「派散水餅、發感謝電郵、出席臨別飯局」)，坊間甚至有散水餅專門店，可見派餅普及程度。
不成文規矩當然有不少灰色地帶，如有網民求教：「做咗3個月實習，使唔使派散水餅？」、「我下個月轉工兼轉行，同同事關係又麻麻，唔派得唔得？」網民反應兩極，「薯仔(低職級)唔使派都得。」有人稱「最起碼派自己部門啦。」亦有人認為「同事請食散水飯，先要派散水餅。」有從事傳媒的網民表示，「有時實習派啲餅仲貴過正職，戥佢哋肉赤。」
視乎公司文化 派餅非必須
安俊人力資源顧問董事總經理周綺萍認為，「散水餅唔係必須，不過係心意。主要用嚟感謝同事、同同事保持友好關係、以及作為同事請食飯嘅回禮。視乎公司文化，形式唔一定係餅，見過有公司習慣每人派一排朱古力，員工做得耐，食得多人哋嘅朱古力，到自己離職請番人都好正常。」至於派餅對象與職級有關，「視乎公司規模，如果係中小企，離職員工又資深，可能係派全公司；基層員工可能派自己部門、同業務有接觸嘅部門就得。」她認同散水餅有愈買愈貴趨勢，「可能社會富裕，以前多數係普通主流餅店或糖果，而家多咗人派高級餅店嘅餅，喺公司可能形成無形壓力。不過，關鍵都係介唔介意人點睇啫。」她續指，一般同事不會期望實習員工派散水餅，「人工唔高，時間又短，即使想派都係便宜小巧食品就得。」
紡織及製衣界立法會議員鍾國斌認為，「離職派散水餅當然唔係必須，視乎嗰位同事點睇嘅啫，想『好頭好尾』咪派；如果係嗌交走嘅，咁就梗係無啦。」他又指派散水餅由來已久，「30年前出嚟做嘢已經係咁，都係公司文化嚟；又唔覺得離職同事嘅散水餅特別高級咗貴咗喎，通常都係主流餅店啫。」
網民
點睇
Hatakashi：我會買，世界其實好細咋。
Swbc：來我公司實習的全部有派散水餅，正式員工就反而好少派餅。
carl.20150508：做得嗰3個月，慳番啲錢仲好。
屢禁不改：做Intern(實習)即係嚟學嘢，派餅當「謝師宴」，應該要的。
立即更新/下載AM730手機APP 體驗升級功能
