杜巴夫卡一戰成名
曼聯又如何？杜巴夫卡首次上陣即勝。
50萬磅周薪「山神」鬥唔過200萬美元門將
昨晚英超最具話題球員，肯定係紐卡素門將杜巴夫卡(Martin Dúbravka)。穿上12號球衣嘅29歲斯洛伐克門將杜巴夫卡，昨晚首次為紐卡素擔任正選鬥英超「二哥」曼聯，先後撲出連格射門、安東尼馬迪爾嘅單刀，仲有「山神」阿歷斯山齊士嘅近射。就算係艾舒利楊格又或者路爾斯華倫西亞嘅左右出波，身高1.87米嘅杜巴夫卡也一一化解危機表現神勇，幫助紐卡素主場以1比0擊敗曼聯。
杜巴夫卡喺2009年5月首次亮相斯洛伐克超級聯賽，2014年轉會到丹麥球隊Esbjerg fB，上年6月加盟斯巴達布拉格。今屆沒有大肆擴軍嘅紐卡素，主因當然係冇錢，所以只可收購沒有名氣同埋東歐國家嘅二線球員。剛完結嘅冬季轉會窗最後一日，紐卡素以200萬歐元(約1,900萬港元)向斯巴達布拉格借用杜巴夫卡至季尾，之後可以400萬美元收購這名斯洛伐克國腳。經過對曼聯一役，相信領隊賓尼迪斯覺得400萬美元購下杜巴夫卡係相當超值。
立即更新/下載AM730手機APP 體驗升級功能
