![周殷廷修行9年終達成兩個心願 尚未續約環球視乎自由度](https://cdn.am730.com.hk/s3fs-public/styles/article_image/public/2024-08/45938508-34b6-4e54-9da4-c9226c0dfeab_0.jpg?itok=9YkJjePF)
周殷廷出道9年終推出首張個人專輯《To Whom It May Concern》。
現年34歲的周殷廷(YT)出道9年,今年先後達成入行以來的兩個心願,先是5月完成兩場的九展處男騷,近日亦終推出了9年來首張收錄16首作品的個人專輯《To Whom It May Concern》。當中包含最新派台,由YT聯同林家謙及潘鵬展作曲的個唱主題曲《晨星》。
YT接受商業一台《星光背後》訪問,剖白開騷最感動經歷外,亦披露獲天后鄭秀文(Sammi)青睞,首度踏足紅館任嘉賓的奇妙心情。節目中,他亦披露續約唱片公司與否的首要條件,YT坦言:「係大公司定細公司都冇所謂,最重要係畀絕對自由度我,因為我太了解自己嘅諗法。」談及5月兩場處男騷,YT直指最感動是看見台下支持自己的家人和樂迷,並稱:「最感動係見到所有人坐喺觀眾席。平時商場表演,係人經過望吓你,宜家係有人用血汗錢買飛嚟睇,係好唔同,真係好感動。表演時會望到屋企人,希望我都可以令佢哋驕傲。」YT指,他與家人溝通較含蓄,但首場完騷一落台就難忍淚水先後擁著父母及兄長爆喊,他亦將此片段剪輯放於新歌《晨星》的MV尾段。而他亦清楚知道,他愧對家人多年,父母兄長會為他感到驕傲,「阿哥carry(照顧)咗我好耐,之前我一直捱緊,佢畀家用畀得多過我,但從來冇一句怨言,亦從冇畀過任何壓力我,所以我喺演唱會爆喊,係因為覺得有愧於佢哋。」
![周殷廷感激Sammi力撐。](https://cdn.am730.com.hk/s3fs-public/styles/article_image/public/2024-08/97420a28-94f7-4b37-abc8-4b97e7ca1683.jpg?itok=XYCbDbo_)
周殷廷感激Sammi力撐。
感激Sammi力撐
YT的堅持追夢故事,亦獲天后Sammi應援,除了前作《三生有幸》獲天后轉發,Sammi的13場紅館個唱,YT亦被欽點擔任第8場嘉賓,談及獲天后提攜,YT由衷感激說:「最先係呆咗,一開IG就見DM炸爆咗,原來係Sammi repost咗我首《三生有幸》,佢又用我另一首歌做瑜伽;之後再就收到寰亞(Sammi唱片公司)邀請我做嘉賓。」對於突如其來的機會,他直言感到難以置信和榮幸,「從來無諗過會畀天后級嘅Sammi留意到,人生第一次做演唱會嘉賓、第一次上紅館,就可以上紅館四面台,仲要喺Sammi騷唱自己首歌,我喺台上面講嗰番說話真係發自內心,只要有華人嘅地方,都一定聽過鄭秀文個名,但我咩嘢都唔係,竟然可以同佢共享同一個舞台,好榮幸夢幻。」YT亦大讚Sammi對後輩相當貼心,十分照顧後輩。
兩場個人騷,YT分別請來相識於環球唱片的好友Gin Lee李倖倪及JACE陳凱詠任嘉賓,兩人先後離娘家,最近YT亦被指與唱片公司續約拉鋸中,談及Gin Lee簽大公司事業更上一層樓,JACE則轉做獨立歌手殺出佳績,問YT自覺適合哪一條路繼續發展,他承認去年8月已約滿,行哪條路最重要都是在「有否絕對自主權」及「資源配合」取得平衡。YT說:「如果好獨立但沒有團隊support會搞唔掂,大公司團隊好大但冇自由度又會死,所以最重要係拎到個平衡同埋有自由度,因為我好知道我要乜嘅團隊,亦好知道要點market我自己。」
![現年34歲的周殷廷,今年5月完成兩場九展處男騷。](https://cdn.am730.com.hk/s3fs-public/styles/article_image/public/2024-08/20631025-c172-4f4f-b0f7-e8a2c89477dc.jpg?itok=WczVGlJO)
現年34歲的周殷廷,今年5月完成兩場九展處男騷。