2024-08-12 15:00:00

渣哥茶餐廳將於多倫多重開網民一幅相睇出新鋪位置譚小環渣哥異地再出發

譚小環同老公蔡強榮（渣哥）2014年喺銅鑼灣開設小食店，小環親自落場成為一時話題，生意有利可圖後，小環同渣哥後來開埋茶餐廳，不過由於消費市道疲弱，喺九龍灣嘅茶餐廳年初被指欠租，仲被貼上封鋪告示。當時渣哥向傳媒承認確有其事，並喺社交媒體發文提及食肆經營情況，指「其實生意差咗都年幾兩年，尤其係通關之後，不過唔想影響到班員工同埋供應商，所以一路都默默撐得幾耐得幾耐」，但佢表示並無拖員工同埋供應商嘅數，「1蚊都冇欠過佢哋」。最終茶餐廳喺5月被業主封鋪﹐6月正式結業。

近期喺多倫多生活嘅小環同渣哥夫婦，原來正準備將茶餐廳「移民」到當地。渣哥喺茶餐廳嘅社交帳戶發文「古希臘神話傳說中，眾天神保管著一條擁有神奇力量嘅鑰匙，它能夠將宇宙一切歡樂喜悅匯聚於一起，無論身處天涯海角，都能夠讓大家再次重遇！咦⋯照片中呢條，難道就係傳說中嘅⋯⋯楓再起匙」，加上拎住商鋪門匙，似乎暗示將會喺多倫多再度開檔。

渣哥個post標註地點係多倫多北面嘅Markham（萬錦市），並貼上網上地圖街景，有眼利網民竟然睇得出位置喺邊，留言連街道號碼都寫埋！Markham屬於當地華人聚居地點，區內有唔少港式茶餐廳，假如位置屬實，渣哥新鋪附近仲有間華人超市，難怪有當地網民話第時可以飲完奶茶去買餸。

小環同渣哥嘅茶餐廳獲創立《100毛》嘅毛記葵涌注資入股，不過後來遇上疫情及消費市道疲弱等原因，根據毛記葵涌財務報表，截至2023年3月底，渣哥品牌旗下嘅小食店，以及2間位於九龍灣同灣仔嘅茶餐廳，該年度合共蝕1400萬元，比起前一年虧損380萬元，情況令人擔憂。而喺2022年，渣哥曾經發文指本來有意向毛記葵涌回購股份，但聲稱對對方嘅出價感到震驚。

原文刊登於 Yahoo 娛樂圈